Elementos del grupu 11

El grupu 11 de la tabla periódica ta formáu polos siguientes elementos:

• Cobre (Cu)

• Plata (Ag)

• Oru (Au)

L'elementu Roentxeniu (Rg), al ser un elementu sintéticu y nun atopase de forma natural, nun se tien en cuenta al falar de los elementos del grupu 11, magar qu'estrictamente forme parte d'elli.

Estos tres metales reciben el nome de "metales d'alcuñar", magar que ye un nome non recomendáu pola IUPAC. Son relativamente inertes y difíciles de corroer. Emplegáronse abondo na alcuñación de monedes, d'ehí-yos vien el nome. El cobre y l'oru son de los pocos metales que presenten coloración.

Aparte de les sos aplicaciones monetaries o decoratives, tienen munches otres aplicaciones industriales pol mor de dalgunes de les sos escelentes propiedaes. Son mui bonos conductores de la lletricidá (los mas conductores de tolos metales son la plata, el cobre y l'oru, nesi orde). La plata tamién ye l'elementu que presenta una mayor conductividá térmica y mayor reflectancia de la lluz. Amás, la plata tien la poco común propiedá de que la capa que se forma al oxidase continúa siendo conductora de lletricidá.

El cobre tamién s'emplega abondo en cables llétricos y en lletrónica. Dacuando úsense contactos d'oru n'equipos de precisión. A vegaes tamién s'usa la plata nestes aplicaciones, y tamién en fotografía, agricultura, medicina, equipos de soníu y aplicaciones científiques.

Estos metales son perblandos y nun soporten bien l'usu diariu de les monedes, desgastándose col tiempu. Por cuenta d'esto han tar aleaos con otros metales pa consiguir monedes más duraderes, más dures y más resistentes al desgaste.