Gran Boston

El Gran Boston ye una rexón metropolitana de Nueva Inglaterra, nos Estaos Xuníos, qu'abarca la ciudá de Boston, nel estáu norteamericanu de Massachusetts^[1], y la so rodiada. La rexón forma l'arcu septentrional de la megalópolis del noreste d'Estaos Xuníos y, puede ser descrita como área estadística metropolitana o como área estadística combinada. La primera, nomada oficialmente pola Oficina d'Alministración y Presupuestu Área Estadística Metropolitana de Boston-Cambridge-Newton, abarca'l terciu oriental de Massachussets, sacante los condaos de la South Coast y cabu Cod; concretamente, los condaos de Norfolk, Plymouth, Suffolk, Middlesex y Essex en Massachusetts, y los de Rockingham y Strafford en New Hampshire. La segunda, nomada oficialmente Área Estadística Combinada de Boston-Worcester-Providence, inclúi amás:

• l'área estadística metropolitana de Providence-Warwick, qu'abarca los condaos de Bristol, en Massachussets, y de Bristol, Kent, Newport, Providence y Washington, en Rhode Island.
• l'área estadística metropolitana de Worcester, qu'inclúi'l condáu homónimu, en Massachussets.
• l'área estadística metropolitana de Manchester-Nashua, qu'abarca'l condáu de Hillsborough, en New Hampshire.
• l'área estadística metropolitana de Barnstable Town, qu'abarca'l condáu homónimu, en Massachusetts.
• l'área estadística micropolitana de Concord, qu'abarca'l condáu de Merrimack, en New Hampshire.
• l'área estadística micropolitana de Laconia, qu'abarca'l condáu de Belknap, en New Hampshire.

Gran Boston
Alministración
País	Estaos Xuníos
Estaos	Massachusetts
Tipu d'entidá	Área estadística metropolitana
Nome llocal	Greater Boston (en)
Xeografía
Coordenaes	42°21′18″N 71°03′54″W / 42.355°N 71.065°O / 42.355; -71.065
Gran Boston Gran Boston (los EE.XX.)
Demografía
Población	4 941 632 hab. (1r abril 2020)
Porcentaxe	70.29% de Massachusetts
Más información
Estaya horaria	UTC−05:00 (horariu estándar) UTC−04:00 (horariu de branu)

Más del 80% de la población de Massachussetts vive nel Gran Boston. L'área estadística metropolitana tenía una población estimada, en 2018, de 4.875.390 habitantes, que facíen d'ella la décima mayor del país. Nel territoriu qu'abarca l'área estadística combinada vivíen, nesa fecha, 8.285.407 persones, que la convierten na sesta mayor del país^[2].

Nel so territoriu asiéntense delles de les instituciones educatives más importantes del mundu, como la Universidá de Harvard y l'Institutu Teunolóxicu de Massachussets, y tamién munchos llugares importantes pa la cultura y la historia d'Estaos Xuníos. Asina, Plymouth foi'l llugar nel que se formó la primer colonia de Nueva Inglaterra, que poblaron los pasaxeros del Mayflower. En 1692, na ciudá de Salem, tuvo llugar ún de los casos más famosos d'histeria coleutiva de la historia del país, los Xuicios de Salem^[3]. A finales del sieglu XVIII Bostón foi conocida como Cuna de la Llibertá (Cradle of Liberty)^[4] pol papel principal que tuvo nes revueltes que desembocaron na Revolución de les Trece Colonies. Dempués, demientres el sieglu XVIII, la ciudá foi un centru comercial perimportante, y el centru de los movimientos abolicionista^[5], por la templanza^[6] y trescendentalista^[7]. En 2004 Massachussets convirtióse nel primer estáu del país en reconocer, de resultes d'una decisión del so Tribunal Supremu, el matrimoniu ente persones del mesmu sexu^[8]. La Kendall Square de Cambridge tien sío llamada «la milla cuadrada más innovadora del mundu» pola alta concentración d'emprendedores y empreses de la economía dixital que surdieron de la rodiada de la plaza dende 2010.