Torres (Ribagorza)

Lo lugar de Torres se troba en la val de Sarrón (entre las sierras de Llaguarre y Carrodilla), a 542 metros d'altaria sobre lo livel d'a mar, a una distancia de 92 km de la ciudat de Uesca, la capital de la suya provincia.

La chent d'este lugar diz Torres cuan charra con chent de la redolada, pa diferenciar-la de Torre d'Esera y Torrobato; ye la sola Torres (en plural) en Ribagorza. La forma larga con apelativo, Torres de l'Obispo, s'emplega cuan charran con chent de difora de la redolada pa diferenciar-la d'atras Torres. La forma teorica bisbe no la trobamos en la parla local.

Ha teniu muitos cambios de nombre oficial a causa d'os cambios de mugas eclesiasticas:

• Torres dica 1495.
• Torres del Abad en 1543, porque en 1307 pasó a depender de l'abadiato de Sant Veturián. Atras variants: Torres del Abadiado de San Victorián (1560), Torres dalabad (1573).
• En 1571 deixó d'esistir este abadiato y se creyó lo bispato de Balbastro. En la bula papal a on se i dicen las mugas d'este bispato, Torres, sin d'apelativo, en ye una:

• Torres del Obispo dende 1575 seguntes Burrel u dende 1646 seguntes Agustín Ubieto Arteta, por perteneixer a lo bispato y no a garra abadiato. Como cuan que se produció este cambio de demarcacions territorials yera cuan se cheneralizaba lo emplego oficial de lo castellano, y como l'aragonés no ha teniu guaire emplego en la ilesia, lo títol oficial yera Obispo y ya no yera Bispe, y ye como s'aplicó a l'apelativo d'este toponimo, apelativo que no ye popular. Una variant de 1660 de lo nombre yera Torres del Señor Obispo de Barbastro.
• Torres de las Cebollas, replegau en 1679 y 1680, podió estar una forma popular, ya que tien relación con la embotada que tienen los de Torres, cebollons.

Ye situau en una zona de transición estricta u microcheografica entre l'aragonés y lo catalán en as suyas modalidaz ribagorzanas. Seguntes lo mapa feito por Artur Quintana, la linia Chuseu-Torres-Alins desparte a l'este parlas catalanas de transición enta l'aragonés y a l'ueste parlas aragonesas de transición enta lo catalán.

Una cosa intresant de la parla de Torres y d'atros lugars de la val d'el Sarrón, como Chuseu y Aler, ye que la terminación -rn de lo catalán se pronuncia -rt (fort, hivèrt, infèrt en cuenta de forn, hivern y infern). En Torres y Chuseu bi ha ciertas plabras no diftongadas como espòna (pronunciada con o ubierta).

• Sant Chaime y Santa Ana, 25 y 26 de chulio.
• Purisma Concepción, 8 d'aviento.

• Lexico de Torres.
• (an) Palotiau de Torres.