Sinyoría d'Albarracín

Lo Sinyor d'Estella Pero Ruíz d'Azagra, aliau de lo Rei Lop se fació con lo poder de Santa María de Aben Razín u Sinyoría d'Albarracín comprando-la u recibindo-la en pagas por los suyos servicios enta 1170. Pero Ruíz d'Azagra trayó con él uns cuantos repobladors de Navarra y La Rioja que se convertirían en una baixa nobleza propietaria.

En 1172 se creyó lo bispau d'Albarracín, dependient de l'Arcebispe de Toledo. La creyación d'ixe bispau, en contra de los intreses de lo bispato de Zaragoza aturó que la Sinyoría d'Albarracín s'adhibise a Aragón, y favoreixió los intreses de la dinastía local de los Azagra, que quereban mantener-sen como sinyors independients. D'ixa traza la Sinyoría d'Albarracín no s'incorporó a lo reino de Navarra y estió dimpués un estau chicot entre Castiella y Aragón, con un dificil equilibrio cheopolitico.

Lo proceso de colonización feudal tendió a chenerar aldeyas agrupadas d'inmigrants que s'establiban y seleccionaban los espacios agrarios mes amplos, deixando los atros como explotacions perifericas u puestos abandonaus. A on millor se vei esto ye en Royuela. Los Azagra creyoron un concello que controlaba a ixas aldeyas y permitiba que las aldeyas ofreixesen una caballería villana. La caballería villana y la baixa nobleza yeran os vasallos directos de los Azagra. Los Azagra teneban amás relacions con los monches de la Orden de Cistels de Piedra y con la Orden de Sant Chaime (por ixo bi ha una ilesia de Sant Chaime en Albarracín).

La Casa d'Azagra entroncó con la Casa de Lara con lo matromonio de Teresa Álvarez de Azagra y Chuan Núñez de Lara. Lo succesor de Chuan Núñez de Lara iba a estar lo suyo fillo Álvar, que no gobernó porque lo rei Pero lo Gran invadió la sinyoría, venció a Chuan Núñez de Lara en la batalla de lo setio d'Albarracín y lo desposeyó en 1283. Pero III adhibió la sinyoría a lo Reino d'Aragón y li'n donó a lo suyo fillo borde que heba teniu con donya Inés Zapata. La comarca d'Albarracín estió la zaguera en adhibir-se a Aragón, pero la conquista de Pero III no estió pa cutio. Pero III reorganizó la sinyoría, dió lo títol de ciudat a Albarracín, que dica ixe inte yera villa y las aldeyas formoron la Comunidat d'Albarracín.

Chaime II, reconoixió la inchusticia d'este feito y lo tornó a Juan de Lara, fillo de lo sinyor desposeiu, en 1248, pero como yera aliau de los Cerdas y de lo virrei de Navarra, Chaime lo tornó a desposeyer. Alifonso IV regalará Albarracín en 1344 a lo suyo fillo Ferrando, qui lo tenió por 29 anyadas. La sinyoría d'Albarracín s'adhibió a lo reino d'Aragón en 1379 ya pa cutio cuan Pero IV ordenó la muerte de Ferrando.