Roma

Diz a leyenda que os bezons Romulo y Remo, fillos de Marte, fuoron albandonatos en naixer. Enfortunadament, una lupa se encargó de aleitar-lis y os ninons creixioron cerenyos. Sindembargo, estando creixitos, Romulo amortó a Remo y establió Roma. Hue en día, o simbolo d'a ciudat imperial contina estando a lupa con os dos ninos. Tanimientres, lo mas probable ye que l'orichen d'o nombre d'a ciudat seiga derivau d'o nombre d'una gens estrusca, ditos Ruma.^[4]

La ciudat de Roma se troba situada en as marguins d'o río Tíber, que la trescruza en o suyo camín enta l'amanada mar Tirrena. En bellos pueyos en una curva d'o río se i instaloron os suyos primers habitants, en os clamaus siet pueyos de Roma.

O territorio d'o municipio (comuna, en italiano) ye muit gran, en haber-se-ie incorporau muitas areas d'a redolada d'a ciudat en que, en estar marismas, no yera posible lo desembolique de l'agricultura y, en consecuencia, yeran rechions despobladas a on no i había que solo paludismo. Modernament, ixo ha feito que la ciudat poseya un amplo rete de zonas verdas y parques arredol d'ella (y que norresmenos la densidat de población d'a ciudat seiga prou baixa). Tamién se troban en o suyo termín comunal bellos chicoz lacos, como lo laco de Bracciano y lo laco de Marignano. Tamién i hay una chicota isla fluvial, la isla Tiberina, amán d'o Pueyo Capitolino.

Dende lo punto d'anvista d'a Cheolochía, lo suelo d'o territorio d'a ciudat de Roma ye conformau por repuis de piroclasto cheneraus fa entre 300.000 y 600.000 anyadas por antigos volcans hue inactivos a lo sudueste d'a ciudat. O río Tiber y los suyos afluents erosonioron dimpués ixes repuis y los en sedimentoron, conformando asinas definitivament o paisache romano primichenio. Hue lo territorio romano ye considerau oficialment como un territorio con un baixo risque de sismicidat.

Encara que lo prencipal curso fluvial d'o termín municipal de Roa ye lo río Tíber, tamién se i troba lo suyo afluent, o río Aniene, que se chune con o Tíbar a lo norte d'a ciudat. En estar tan gran la superficie d'o municipio romano, poseye tamién un amplo trampo de costa en a mar Tirrena (alto u baixo, 20 km de costa, estando lo municipio d'Europa con mas costa maritima.

La ciudat de formó arredol d'os Siet Pueyos de Roma (Pueyo Palatino, Pueyo Aventino, Pueyo Capitolino, Pueyo Quirinal, Pueyo Viminal, Pueyo Esquilino y Pueyo Celio, pero tamién se i trobal en o suyo termín d'atriz chicoz pueyos, mas mas en a suya parte norte, que ye mas montanyosa.

O clima de Roma ye un clima mediterranio (seguntes a clasificación climatica de Köppen, un clima Csa), ye decir, un clima templau con veranos calidos y temperaturas suaves en agüerro y primavera, que gosan estar as estacions con mas plevia (sobre tot noviembre y abril. O verano ye muit caloroso, encara que l'amanada mar Tirrena contribuye a suavizar as temperaturas, con un viento clamau en italiano ponentino, que gosa fer buen ventero de tardadas y de nueiz. En verano y agüerro de pueden producir en determinadas condicions tronadas. L'hibierno gosa estar frido, con plevias frecuents.

La ciudat de Roma, por a suya condición como cabecera d'un amplo imperio mientres la Edat Antiga y como seu d'a Ilesia Catolica dende los primers tiempos d'o Cristianismo, adhibiu a la suya capitalidat en primeras d'o Reino d'Italia y (dende 1945) de l'actual Republica d'Italia, ye depositaria d'una luenga y densa Historia, que ha marcau fundament la ciudat actual.

 

Seguntes a tradición romana, la ciudat de Roma se fundó lo 21 d'abril de 753 aC (ab urbe condita, seguntes a forma romana de calcular los anyos) por dos chirmans melguizos, Romulo y Remo, que heban estau aleitaus por una lupa dita Luperca. En ixas envueltas lo río Tíber feba de muga entre los etruscos a lo norte d'o río y los umbros a lo sud, con un chicot territorio entre los dos ocupau por os latinos, con bellas tribus de pastors nomadas en os Apenins: sabins, samnitas, marsos, volscos, campans, ausons y oscos. Istos pueblos reculliban l'herencio d'os pueblos italicos, una branca d'os pueblos indoeuropeus plegaus en a Peninsula italica en zaguerías d'a Edat de Piedra y que facioron dentrar a redolada en a Edat de Fierro, con a clamada Cultura de Villanova (arredol de 1000 aC). Arredol de 900 aC plegoron os etruscos, con un orichen dica l'inte dubdoso.

Roma yera alavez una crucillada de camins, en un puesto a on hi heba una pasadera ta trescruzar o río, en bel meyo d'a rota comercial que uniba Etruria con Campania y dica on lo río Tíber yera navegable. O pueyo Palatino parixe que estió lo primer lugar en estar habitau de forma permanent (sobre un muit antigo ansentamiento d'o sieglo XIV aC), estendillando-se dimpués enta lo pueyo Esquilino, con un amplo rete de chicoz lugaroz dende Roma enta la embocadura d'o Tiber en a mar Tirrena, que rematoron en confluyir en una chicota ciudat, formada por latinos que ocupaban la primitiva ciudat y los sabins que ocupaban los pueyos d'o Viminal y d'o Quirinal.

Dende lo 600 aC os etruscos fundoron a Liga d'as Doce Ciudaz (en basando-se en o modelo d'a Liga chonica)^[4] y prencipioron una expansión enta lo sud d'o río Tíber, enta la Campania. Mientres iste periodo, la primitiva ciudat de Roma yera una monarquía baixo lo control etrusco, como amuestra la onomastica d'os suyos reis, dica 510 aC, cuan os romanos destronoron a lo zaguer rei de Roma, Tarquinio lo Soberbio. Mientres o periodo monarquico, Roma heba plegau en o control d'os pueblos latinos, o clamau Lacio, en desplazando a l'antiga ciudat d'Alba Longa, que dica l'inte yera la ciudat mas prestichiosa ta los latinos.

En desterrar a lo zaguer rei, Roma se convertió en una Republica de tipo oligarquico, con dos machistraus esleyius por a clase dirichent, os patricios, que yeran os solos habitants d'a ciudat en poseyer a ciudadanía romana. S'escaicioron en os suyos primers tiempos barallas constants entre patricios y plebeyos qur rematoron en bellas conquiestas socials y politicas d'a plebs romana.

En as primeras anyadas d'a Republica, Roma prencipio una expansión enta lo norte, en absorbindo los territorios d'os estruscos, y enta lu sud, absorbindo a samnitas y oscos, en una situación de guerra cuasi permanent (Guerra latina, Guerra d'os Diez Anyos que remató con a conquiesta y destrucción d'a ciudat etrusca de Veyes, guerras contra los celtas que heban invadiu Italia....). O 18 de chulio de 387 aC s'escaició la batalla d'Alia, a on os celtas mandaus por Brenno redotoron a los romanos, conquerindo y espullando dimpués la ciudat de Roma, que prencipió poco dimpués a suya reconstrucción fisica y tamién a reconstrucción d'o sistema d'alianzas, que s'heba crevau parcialment con a redonta debant d'os celtas.

Ixo permitió a la Republica romana la conquiesta de cuasi toda la pensinsula italica, dende las planas d'o río Po en o norte dica la Magna Grecia en o sud. En os sieglos III aC y Ii aC, s'escaicioron as guerras punicas contra Cartago por o control d'a Mediterrania occidental y las guerras macedonicas contra lo Reino de Macedonya, que rematoron con a expansión de Roma enta lo sud, l'este y l'ueste, con a creación d'as primeras provincias romanas en Sicilia, Cerdenya, Hispania, Macedonya, Grecia y Africa. Ixas conquiestas se traducioron en l'afluencia de recuros monetarios y de nueva población enta la ciudat de Roma, que prencipio un primer proceso de construcción d'edificios publicos.

Dica lo sieglo I aC s'escaició un proceso de disturbios socials y mesmo de guerras civils, estando un periodo en que conoixemos a las figuras mas destacadas d'o panorama politico, como Tiberio Sempronio Graco y su chirmán Cayo, Cayo Mario, Lucio Conelio Sila, Marco Emilio Lepido, Gneu Pompeyo Magno, Marco Licinio Craso, Lucio Serchio Catilina, Marco Tulio Cicerón, Chulio César y Augusto. Tanimientres, mientres istas anyadas Roma estendilló lo suyo poder en conquerindo Hispania, la Galia, lo norte d'Africa, Grecia y parte d'os Balcans, Anatolia... dica convertir-se practicament en o centro d'o mundo conoixiu.

En o 27 aC Augusto, que en a zaguera guerra civil heba formau parte d'un triunvirato vencedor, chunto con Marco Antonio y Marco Emilio Lepido, essdevién princeps civitatis y se li concede por o Senau lo títol d'Imperator, convertindo-se asinas Roma en una monarquía de feito, encara que en os primeros tiempos formalment se manteneban as institucions republicanas, establindo la primera dinastía imperial, la dinastía Chulio-Claudia. Augusto fomentó un intenso treballo de milloras en a ciudat de Roma, en esviellando muitas d'as suyas edificacions.

Mientres o reinau de Nerón, lo zaguer miembro d'a dinastía, s'escaició lo gran incendio de Roma, o 19 de chulio de l'anyo 64. Lo fuego s'inició amán d'o Circo Maximo y duró entre cinco y siet días. Seguntes Tácito, en os suyos Annales, l'incendio duró cinco días y destruyó cuatre d'os catorce districtos d'a ciudad y que atros siet fuoron muit afectaus. Suetonio, en De vita Caesarum, diz que tenió una durada de seis días y siet nueiz. O solo historiador en describir l'incendio estió Plinio o Viello, en Naturalis Historia, pero muitos historiadors d'ixas envueltas no mencionan l'episodio. Tanimientres, ye evident que la ciudat de Roma en quedó muit danyada. Dende l'incendio dica hue bi ha debat entre los historiadors sobre qui estió lo responsable de l'incendio, que bel-uns atribuyen a lo mesmo Nerón.

Antiparte, dende meyaus d'o sieglo I s'estendilló por l'Imperio Romano (y por la ciudat de Roma, que yera la suya capital y centro politico y cultural) una nueva relichión, o Cristianismo, en primeras considerau nomás que una secta mas aintro d'o Chudaísmo pero que bien luego s'estendilló mica en mica por todas las capas socials de l'Imperio y d'a ciudat, que se convertió en lo principal centro relichioso d'a nueva relichión en establir-se-ie lo suyo maximo dirichent, lo Papa, no res menos d'as persecucions ciclicas que sufrioron los cristianos dica lo sieglo IV. La primera gran persecución contra éls estió bien luego d'o gran incendio de Roma en l'anyo 64, en culpar Nerón a los cristianos d'estar éls os responsables, en iniciando asinas la primera d'as grans persecucions contra los cristianos, en a cual parixe que fuoron martirizaus os apóstols Sant Pero y Sant Pavlo.

L'emperador Constantín I, promulgó en la ciudat de Milán en 313 l'Edicto de Constantín, que decretaba la libertad relichiosa en tot l'Imperio Romano. Dende alavez, s'estendilloron por tot lo territorio imperial nuevas ilesias, y la ciudat de Roma no estió una excepción a ixas construccions. O fenomeno s'amplificó dende l'Edicto de Tesalonica d'o 27 de febrero de 380 dictau por Teodosio I, que declaraba lo Cristianismo como la relichión oficial de l'Imperio.

Os fillos de Teodosio dividioron en dos l'imperio, quedando-se Arcadio con a metat oriental (lo que se conoixe como Imperio Bizantín) y Honorio la metat occidental, l'Imperio Romano d'Occident, mantenendo-se la capitalidat en Roma dica 395, que se tresladó enta Milán y dimpués en 402 enta Ravena, en considerar-se que istas ciudaz yeran mas fácils de defender de l'ataque d'os visigodos, que prencipiaban a fer incursions por a peninsula italica. Asinas, Roma dixó d'estar lo centro politico de l'Imperio, pero se i mantenió como seu d'o Cristianismo, en continar residindo-ie lo Papa.

En l'anyo 410 Roma fue espullada por os visigodos mandaus por Alarico, que cremoron la ciudat (que dica l'inte no heba estau espullada dende los tiempos de Brenno y d'as incursions celtas de feba ueito sieglos)^[5] estando reconstruyida dimpués con a decisiva intervención d'os Papas, que poquet a poquet se convertiban en a prencipal autoridat d'a ciudat a toz os livels. Tanimientres, en 455 Roma fue obchecto d'un nuevo ataque y espullamiento, ista vegada a mans d'os vandalos con una flota de 100 barcos mandaus por Chenserico^[6] dende lo Reino vandalo que heban establiu en o norte d'Africa. Encara que los Papas tornoron a impulsar la reconstrucción d'a ciudat y que lo Papa Lión I evitó que los hunnos d'Atila la conquerisen, pocas anyadas dimpués, en 472, Ricimer y Olibrio la tornoron a espullar.

O 4 de setiembre de 476, Odoacro depone a Romulo Augustulo y se converte en gubernant de facto d'Italia, rematando asinas con la existencia de l'Imperio Romano d'Occident. Odoacro fue asasinau por Teodorico lo Gran, qui establió lo Reino Ostrogodo d'Italia, que continaba mantenendo la suya capital en Ravena. Cuan os bizantins drestruyoron lo reino ostrogodo y conquirioron Italia en 553, tamién conservoron la capitalidat en Ravena. En 568 plegan en Italia los longobardos d'Alboino,^[7] que fundan os ducaus d'Espoleto y Benevento en o centro y lo sud d'a peninsula y que se converten en cuasi independients d'o Reino longobardo en o norte. Tanimientres, la ciudat de Roma, con un chicot territorio arredol, contina en mans bizantinas, fendo parte de l'exarcau de Ravena, como ducau de Roma.

En 728 Liutprando, lo rei longobardo, cede a lo Papa Gregorio II bellos territorios fuera d'o ducau de Roma, que feban parte d'o reino longobardo. Sobre ista base, os Papas posteriors chustificoron y reclamoron la existencia d'un estau propio, lo que dimpués estioron os Estaus Pontificios, encara que por bel tiempo mas continoron reconoixendo l'autoridat bizantina. Cuan en 751 se produz a primera intervención d'o Reino franco en Italia contra los longobardos, remata lo dominio bizantín en Italia central y Roma se converte en una posesión directa d'o Papa, chunto con os territorios cedius por Liutprando y d'atros territorios que lis ceden los francos dimpués d'a suya conquiesta. En 774, Carlos Magno dentra en Italia en aduya d'o Papa y remata la existencia d'o reino longobando, en incorporando-lo a los suyos dominios y fendo liga con o Papau, reconoixendo-li la suya sobiranía sobre los Estaus Pontificios. Como recompensa, o 24 d'aviento de 800 o Papa Lión III coronó a Carlos Magno en Roma como Emperador d'Occident, naixendo asinas l'Imperio Carolinchio.^[8]

O 23 d'agosto de 846, una flota de piratas berberiscos desembarca en o puerto d'Ostia y remonta lo río Tíber dica la ciudat de Roma, espullando edificios de l'arrabal d'a ciudat y fuyindo dimpués por tierra con o botín ta Fondi y Gayeta.^[9] Dimpués d'iste ataque, lo Papa Lión IV fortifica la Ciudat lionina, que alto u baixo se correspón con l'actual Ciudat d'o Vaticano, en debantando la dita muralla lionina.^[10]

Mientres la Edat Meya, se producioron en Roma frecuents barallas entre las familias d'a nobleza romana que refirmaban lo papel politico d's Papas y las familias nobles que preferiban refirmar lo poder d'os emperadors. En 1300 o Papa Bonifacio VIII proclamó lo primer Chubileu, con o que preteneba reformar lo suyo poder temporal, en plegar en Roma alto u baixo 2 millons de pelegrins. O mesmo papa establió la Universidat de Roma La Sapienza o 20 d'abril de 1303, a traviés d'a suya bula In supraemae praeminentia Dignitatis, con l'obchectivo de disponer en a ciudat d'una gran universidat con prestichio reconoixiu. Tanimientres, en 1309 lo Papa Climent V tresladó la suya seu a la ciudat d'Avinyón y dende alavez tornoron as barallas entre las familias nobles ta lograr o control d'a ciudat, que dentró en un proceso de decadencia dica lo punto que en o sieglo XV la ciudat de Roma no teneba so que arredol de 20.000 habitants. Mientres o breve pontificau de Nicolau V se decidió albandonar bels puestos d'a ciudat que se consideraba que yeran masiau vinclaus a lo paganismo, como lo Laterán, y decidió la construcción en un nuevo lugar d'una gran basilica, que ye la basilica de Sant Pero.^[11] Dende alavez la ciudat de Roma quedó baixo lo control d'os Papas mientres cuasi cuatre sieglos, que en marcoron la suya vida politica y cultural.

En primerías d'o sieglo XVI, lo Papa Climent VII decidió refirmar a lo Reino de Francia en a suya luita con l'Imperio espanyol, que controlaba la mayor parte d'a peninsula italica, en prebando de crebar lo suyo poder en Italia en formando la dica Liga de Conhac con o reino de Francia, o reino d'Anglaterra, lo ducau de Milán, la Republica de Florencia y la Republica de Venecia. Como consecuencia, la familia d'os Colonna, aliaus de l'emperador en a ciudat de Roma, con l'aduya d'o virrei de Nápols Carlos de Lannoy, prenioron mientres bel tiempo la ciudat en espullando posesions d'os partidarios d'o Papa. Las topas papals y venecianas decidioron esperar que plegasen las tropas francesas ta abanzar enta Nápols, pero los imperials reunioron un exercito formau por tropas espanyolas baixo lo mando de Carlos de Borbón y por tropas de lansquenetz alemans baixo lo mando de Georg von Frundsberg y marchoron enta Roma. Tanimientres, von Frundsberg enfermó y Carlos de Borbón en prenió tamién lo mando, marchando unius enta Roma. Francesco Guicciardini, qui mandaba las tropas papals, prebó de frenar lo suyo abance, pero lo redotoron. Asinas, alto u baixo 20.000 soldaus imperials se troboron victoriosos pero sin paga, porque los diners ta pagar-lis no i heban plegau. Asinas que se sublevoron y forzoron a lo suyo chefe a dentrar en Roma ta espullar-la, plegando debant d'as murallas d'a ciudat o 5 de mayo de 1527.

Ta esfender Roma nomás hi heba alto u baixo 3.000 soldaus poco entrenaus mandaus por o condottiero Renzo da Ceri, una xicota colla de ciudadans de Roma agrupaus en una milicia urbana y la Guardia Suiza Pontificia, muit disminuida en o suyo numero en acabar de licenciar a 2.000 d'os suyos miembros. En no tener artillería los imperials, decidioron atacar nomás haber plegau, en morindo Carlos de Borbón en l'asalto d'un arcabuzazo. Ixo remató con cualsiquier repui de disciplina que podese quedar en as tropas imperials, que atacoron cerenyament y prenioron ixe mesmo día las murallas de Roma a l'asalto.

Os repuis d'a Guardia Suiza, 189 soldaus, preboron de resistir en as puertas d'a Basilica de Sant Pero, pero bi habió una mortalera y nomás en sobrevivioron que 42. Tanimientres, con a suys resistencia permitioron que lo Papa Climent fuyise por un pasadizo secreto enta lo castiello de Sant'Angelo. alavez, as tropas imperials prencipioron un espullamiento sistematico d'a ciudat y d'as suyas riquezas, en exercindo amás greus violencias contra los suyos habitants, no respetando so que bellas ilesias espanyolas; mesmo los cardenals partidarios de l'emperador se veyoron obligaus a pagar un rescate ta librar-se'n. Mesmo campesins d'arredol d'a ciudat de feudos d'os Colonna, que heban padeixiu os espullamientos d'as tropas papals, venioron a escape a Roma ta vengar-se'n participar-ie en lo suyo espullamiento, que duró dica que Climent se rindó a los imperials lo 6 de chunio, no res menos d'as órdens d'o nuevo chefe d'os imperials, Filiberto de Châlons, qui prebó de fer tornar en la suya obediencia a los amotinaus.

Dende alavez, Climent ponió muita cura en no contrariar los deseyos de l'emperador, y poquet a poquet la ciudat se recuperó de l'espullamiento. D'una man, la Reforma protestant, que triunfó en tot o norte d'Èuropa, provocó una perdua d'a influencia politica d'o Papau en Europa, encara que continó tenendo-la entre los países catolicos. D'atra man, por contra, s'accentuó lo desembolque d'a ciudat, mas que mas a nivel d'o suyo urbanismo: la nobleza d'a ciudat y los prencipals cardenals d'as familias nobles d'Italia se i construyoron suntuosos nuevos palacios en potenciando lo papel de Roma como l'autentico centro cultural d'o mundo en ixas envultas. En particular, lo Papa Sixto V a finals d'o sieglo XVI tenió un papel destacau en iste floreiximiento urbán de Roma.

Lo dominio temporal d'o papa se veyó crebau con os escaicimientos posteriors a la Revolución francesa, cuan las tropas francesas dentroron en os dominios papals y proclamoron a Republica Romana, encara que lo nuevo rechimen no duró so que un anyo, entre lo descontento cheneral d'a población d'a ciudat. Tanimientres, en o marco d'as Guerras napoleonicas, l'emperador Napoleón Bonaparte dentró en a ciudat con as tropas francesas o 2 de febrero de 1808 y la adhibió a lo Primer Imperio francés en 1809, en proclamando dimpués a o suyo fillo ninón como Rei de Roma. En iste periodo l'emperador encargó a Antonio Canova la modernización d'a ciudat y ordenó que se fesen en o Foro Romano las primeras excavacions queolochicas en un sentiu mas moderno, treballo que li encargó a l'arqueologo francés Antoine Chrysostome Quatremère de Quincy.

Cuan en 1813 Napoleón fue redotau en a batalla de Leipzig, o Primer Imperio francés s'esboldregó. Joachim Murat, cunyau y aliau de Napoleón, decide cambear de bando, ta preservar o suyo títol de rei de Nápols, y las tropas napoletanas de Murat dentran en Roma lo 19 de chinero de 1814. Lo 23 de chinero Napoleón liberó a lo Papa Pío VII, a qui heba manteniu preso, y lo Papa tornó en Roma lo 24 de mayo, en recuperando lo suyo poder temporal sobre los Estaus Pontificios, feito sancionau por o Congreso de Viena en 1815. Tanimientres, en Roma s'inició un periodo turbulento que culminó en 1848 con as Revolucions liberals que en Roma significoron la proclamación de nuevo d'a Republica Romana en 1849, un rechimen politico dominau por as figuras de Carlo Armellini, Giuseppe Mazzini y Aurelio Saffi. A nueva republica no tenió una durada so que de cinco meses, en recibir o Papa lo refirme de l'emperador francés Napoleón III, qui ninvió tropas de l'exercito francés mandadas por o cheneral Nicolas Charles Oudinot ta safocar la rebelión republicana.

En primerías d'os anyos 1860 Victor Manuel II, qui yera rei d'o reino de Cerdenya, heba conseguiu aglutinar a lo suyo reino una parte important d'a peninsula italica en o proceso d'unificación d'Italia con l'aduya d'o suyo competent primer ministro Camillo Benso di Cavour, y lo 18 de febrero de 1861 proclamó lo reino d'Italia. Dende alavez escomencipioron as presions d'o nuevo rei sobre lo Papa Pío IX, en convidando-lo a albandonar lo suyo poder temporal y fer-ne la cesión d'ixe poder sobre Roma a lo nuevo rei d'Italia. Pero Napoleón III, qui heba colaborau con Victor Manuel II en o proceso d'unificación italiana (recebindo en contrapartida Niza con la suya redolada y lo condau de Saboya), prefirió continar con o suyo refirme a lo poder temporal d'o Papa, mantenendo en Roma tropas francesas ta garantir la suya protección, y Victor Manuel tenió que asperar un cambeo d'as circumstancias politicas.

O 19 de chulio de 1870 esclató la Guerra franco-prusiana entre lo Segundo Imperio Francés d'una man y la Confederación Alemanya d'o Norte y bellos reinos alemans (baixo lo control toz éls d'o Reino de Prusia) d'atra man. L'exerito francés, con poca preparación y sin garra alianza y refirme d'atros países, fue redotau de raso en a batalla de Sedan o 2 de setiembre d'ixe mesmo anyo y Napoleón III se convertió en presonero y lo politico republicano Léon Gambetta proclamó lo 4 de setiembre la Tercera Republica Francesa. Victor Manuel II, qui yera asperando la suya oportunidat, en fació buena honra d'as circumstancias y decidió d'atacar Roma. O 20 de setiembre as tropas de l'exercito italiano mandadas por o cheneral Raffaele Cadorna esfrecatenoron as murallas de Roma, dentroron en a ciudat y s'escaició la conquiesta de Roma, escaicimiento encara hue celebrau en toda Italia. Pío X se retiró en bellas chicotas posesions que li estioron concedidas (l'actual Ciudat d'o Vaticano), y la ciudat de Roma se convertió en la capital d'o Reino d'Italia en substituyindo a Florencia (que l'heba estau dende 1865).

En os primers anyos d'o sieglo XX Italia en cheneral y la ciudat de Roma en particular, en estar la capital de l'estau, dentroron en un periodo de bella inestabilidat mientres os succesivos gubiernos de Giovanni Giolitti en a clamada era giolittiana. L'amanixer d'o movimiento obrero organizau en sendicatos y las suyas reivindicacions laborals y socials frent d'o Gubierno y d'a patronal en estioron as causas prencipals, chunto con bello irredentismo d'o nacionalismo italiano que consideraba que encara quedaban territorios habitaus por italianos que feban parte de l'Imperio Austrohongaro y que caleba incorporar a la Mai patria italiana. Giolitti, en prebando d'acontentar a las masas, establió lo sufrachio universal en o reino, encara que él no en yera partidario, mesmo que tenió que acceptar la Guerra italo-turca en 1911 t'acontentar a lo creixient nacionalismo en o país.

En ixas condicions esclató en 1914 la Primera Guerra Mundial y en un primer momento Giolitto dedidió mantener la neutralidat d'o reino d'Italia en considerar que lo país no yera preparau ta la guerra, encara que Italia formalment feba parte d'a Triple Alianza establida en 1882 con l'Imperio Austrohongaro y l'Imperio Alemán. Antiparte, se consideró que la Triple Alianza yera un tractau de carácter defensivo y que Austria no yera pas l'estau agrediu, so que l'estau agresor. Pero en realidat la cuestión prencipal yera que Italia teneba interés en la incorporación a lo reino de bellas partes de l'Imperio Austrohongaro, en Dalmacia y lo Tirol d'o Sud. Austria ufrió a Italia si dentraba en a guerra la colonia francesa de Tunicia, pero la Triple Entente li ufrió a Italia los territorios que reclamaba a Austria y finalment lo 3 de mayo de 1915 lo reino d'Italia denunció formalment o tractau d'a Triple Alianza, lo 20 de mayo se votoron en o Parlamento italiano os creditos de guerra y lo 23 de mayo lo reino d'Italia declaró la guerra a l'Imperio Austrohongaro (pero no a l'Imperio Alemán, con qui no dentró en guerra so que quince meses dimpués). Encara que muitos politicos no yeran favorables a la partecipación italiana en a guerra, toz éls heban votau los creditos que s'amenistaban ta la dentrada en guerra d'o país, con nomás que una excepción, os deputaus en o Parlamento italiano d'o Partito Socialista Italiano. Tanimientres, bel-uns d'os suyos dirichents y militants sí que en yeran partidarios, en destacando entre éls un alavez cuasi desconoixiu Benito Mussolini, director d'o diario socialista Il Popolo d’Italia, qui dende 1914 preconizaba con os suyos escritos en o diario la dentrada d'Itaia en a guerra y qui como consecuencia d'a suya postura contraria a la linia oficial d'o partiu en fue expulsau.

Mientres a guerra s'escaicioron bellos desastres militars de l'Exercito italiano, en destacando la batalla de Caporetto en 1917 y las batallas de l'Isonzo mientres toda la guerra, con los suyos estrafuellos de vidas italianas (mientres la guerra Italia padeixió mas d'un millón de muertos). La partecipación italiana en a guerra exacerbó lo nacionalismo italiano y las suyas reivindicacions territorials pero en rematar a guerra con o Tractau de Versailles lo nacionalismo italiano tenió una gran decepción en no conceder-se-li a lo país la totalidat d'as suyas reivindicacions.

Antiparte, l'economía d'Italia yera en rematar la guerra completament esboldregada por l'esfuerzo financiero que heba provocau la financiación d'a guerra y la crisi economica enreció una creixent crisi social y una polarización d'a politica italiana, con una oliada de vadas por tot o país. D'una man Benito Mussolini establió en marzo de 1919 los Fasci italiani di combattimento que en 1921 se convertioron en lo Partito Nazionale Fascista tenendo como puntos centrals d'a suya politica l'irredentismo italiano y lo corporativismo que teneba como obchectivo rematar con a luita de clases en substituyindo-la por una ambigua cooperación de clases. D'atra man, lo Partito Socialista Italiano se dividió en dos partes, moderada y radical, establindo-se en chinero de 1921 lo Partito Comunista Italiano (sección italiana d'a Internacional Comunista) impulsau por los dirichents Amadeo Bordiga y Antonio Gramsci como reacción a lo faixismo y a la violencia politica que practicaban os suyos squadristi d'a Milizia Volontaria per la Sicurezza Nazionale (conoixius popularment como camisas negras).

En as eleccions chenerals d'Italia en 1919 s'escaició una redota d'os liberals, que perdioron la suya mayoría absoluta en o Parlamento italiano, y un amplo creiximiento d'os socialistas, que plegoron en os 156 deputaus. Francesco Saverio Nitti fracasó en o suyo intento d'estabilizar lo país y ixo mesmo s'eacaició con un nuevo Gubierno de Giovanni Giolitti. Ixo radicalizó encara mas a la dreita politica italiana, que consideró como favorable a los suyos intreses la violencia politica d'os faixistas en as carreras de Roma y de tot lo país. En ixas condicions, Mussolini convocó ta lo 27 d'octubre de 1922 la clamada Marcha enta Roma de toz los faixistas d'Italia. Luigi Facta, qui alavez yera lo Primer ministro d'Italia, prebó d'evitar la marcha en pedendo aduya a l'escritor ultranacionalista Gabriele D'Annunzio y lo 25 d'octubre, en trobar la ciudat de Roma ocupada por mils de camisas negras declaró l'estau de setio d'a ciudat, pero lo rei Victor Manuel III rebuyó ratificar ixa declaración y lo 29 d'octubre pedió a Mussolini que formase un nuevo Gubierno, formando-se o Gubierno Mussolini lo 30 d'octubre. Mientres los meses siguients Mussolini limó poquet a poquet las caracteristicas de democracia d'o sistema politico italiano dica plegar en una dictadura faixista.

Mientres o rechimen faixista, que duró vinte anyadas, la ciudat de Roma tenió una funda transformación, convertindo-se en o escaparate d'o nuevo rechimen, que quereba trasnsmitir una imachen de modernidat y de grandeza; y lo mesmo Mussolini s'implicó personalment en a transformación d'a ciudat. Asinas, se destruyoron muitos edificios medievals y renaixentistas ta que la ciudat tenese amplas avenidas, como la Via dei Fori Imperiali a lo canto d'o Coloseu u la Via della Conciliazione ta unir Roma con a Ciudat d'o Vaticano (establita formalment como estau en 1929 con os Pactos lateranenses). Tamién naixioron en ixas envueltas bellos nuevos barrios en la ciudat u s'establió Cinecittà t'aglutinar la producción cinematografica italiana y convertir-se en un nuevo Hollywood europeu. Tamién destacó la construcción d'o nuevo barrio d'Esposizione Universale Roma, construyiu ta que se bi fese una Exposición Universal en 1942 ue en zagueras no se celebró por causa d'a guerra.

Lo rechimen faixista escomencipió una etapa marcada por o militarismo y la exaltación d'as glorias de l'Imperio Romano como lo suyo antecedent historico. Asinas, en octubre de 1935 Italia invadió l'Imperio d'Etiopia en a Segunda guerra italo-etiope con tropas mandadas por Emilio De Bono y Rodolfo Graziani, en anexionando-se Etiopia. En a Guerra Civil espanyola lo rechimen faixista destacó por a suya aduya a los militars sublevaus de Francisco Franco. Tamién tenió una gran actividat diplomatica ta favoreixer la suya expansión por a mar Mediterrania y en abril de 1939 os italianos invadioron Albania fendo-ne fuera a Ahmet Zogu (qui s'heba autoproclmau reu d'Albania) y proclamoron a Victor Manuel III como rei d'Albania.

Tanimientres, en esclatar la Segunda Guerra Mundial, Mussolini tenió en primeras muita caurtela y proclamó la neutralidat d'o país. Pero en mayo de 1940, en prencipiar con a-saber-lo d'exito ta lo Tercer Reich la batalla de Francia, Italia dentró en la guerra lo 10 de mayo d'ixa anyada. Mussolini teneba como obchectivo lo control d'a mar Mediterrania en o concepto clamau Mare Nostrum italiano. Sindemnargo ixas ambicions toporon con una cruda realidat y en mayo de 1941 l'Exercito britanico redotó a los italianos en a campanya d'Africa Oriental, campanya que remató con a rendición oficial d'as tropas italianas lo 16 de mayo de 1941. En a campanya en Africa d'o Norte lo cheneral italiano Rodolfo Graziani atacó Echipto con arredol de 250.000 soldaus en setiembre de 1940, pero no abanzó muito y decidió d'asperar dica que los britanicos mandaus por Archibald Wavell contraatacoron con a Operación Compass en aviento, contraataque que comportó la ocupación d'a metat d'a colonia italiana en l'actual Libia. En a mar Mediterrania tamién s'escaicioron importants redotas italianas, como la batalla d'o cabo Spada en chulio de 1940 u la batalla d'o cabo Matapan en marzo de 1941. Antiparte, en octubre de 1940 tropas italianas dende Albania mandadas por Sebastiano Visconti Prasca atacoron lo Reino de Grecia esclatando asinas la Guerra greco-italiana, en la que Grecia recibió lo refirme d'o Reino Uniu pero en noviembre l'Exercito griego contraatacó dixando a las tropas italianas en una difícil situación]].

Fracasaus los obchectivos italianos en a guerra, poquet a poquet los Aliaus conquirioron Africa d'o Norte ta desembarcar en Sicilia en chulio de 1943 (Operación Husky) y redotando-ie a las Potencias de l'Exe. Ista redota tenió como consecuencia la destitución de Mussolini por lo rei Victor Manuel III con a consiguient cayida d'o rechimen faixista y la rendición d'italia, que se convertió dende alavez en un campo de batalla dica la fin d'a guerra, con un lento abance d'as tropas aliadas dende lo sud dica lo norte d'o país.

La ciudat de Roma, que mientres la guerra heba estau bombardiada por os Aliaus y heba padeixiu la ocupación militar alemana (con feitos como la mortalera d'as Fosas Ardeatinas), fue liberada por tropas de l'Exercito estausunidense lo 4 de chunio de 1944, recuperando poquet a poquet la normalidat dica la fin d'a guerra.

La ciudat de Roma tenió mientres os anyos 1950 y 1960 un gran creiximiento y con l'auche d'o turismo se convertió en un important centro d'atracción turistica, en urbaniando-se amplas arias arredol d'a ciudat con nuevos barrios y con infraestructuras como la Gara de Roma Termini, lo metro de Roma u instalacions ta los Chuegos Olimpicos de Roma 1960, refirmando-se la posición d'Italia como centro politico, financiero y cultural d'Italia.

• Festival Internacional de Cine de Roma.

• Coliseu.
• Tiermas de Caracalla

• Antiga Roma.
• Arias metropolitanas en a Unión Europea.
• Universidat Niccolò Cusano.
• Piazza Navona‎.

•   Buenos Aires (Archentina).
•   Bogotá (Colombia).
•   Caracas (Venezuela).

•   Se veigan as imáchens de Commons sobre Roma.
• (it) Pachina web oficial municipal de Roma.
• (en) Pachina web de l'oficina de turismo de Roma.
• (en) Pachina web d'os museus de Roma.