La Romana

Ye situau en la cuenca de lo río Aguas, entre Zaila y La Zaida. Se riega con una zaica de la dreita de lo río Aguas, la Richuela, que tien un nombre que ye posiblement una deformación de rigachuela.

Bi ha un chacimiento arqueolochico dito El Castillejo de la Romana, d'epoca iberica. Castellar y Castillejo son toponimos recurrents en chacimientos ibericos u celtibericos, y lo segundo a vegadas puet estar una castellanización de l'aragonés "Castelillo", "Castelello".

De lo que ye lo despoblau actual bi n'ha referencias dende por lo menos lo sieglo XIII, en latín medieval y en aragonés. Los textos en latín fan referencia a las relacions con lo monesterio de Rueda. En un primer inte dos tercios de la Romana yeran propiedat de lo sinyor de Belchit Galín Ximénez, pero la suya muller Sancha en agosto de 1202 cedió lo castiello de Romana con la suya sinyoría y toz los termins suyos a la Orden de Cistels y a l'abat de Rueda.

Bi ha referencias de la Romana en aragonés en lo libro Fuentes históricas aragonesas:

Se sabe que en 1215 los habitants de La Romana consiguioron la construcción d'una zut que preneba las auguas de lo río Aguas a l'ueste de Zaila.^[1]

Cuan Labanha fació lo mapa d'Aragón (1710-1720), la Romana yera un lugar mes gran que atros d'arredol que huei tienen población. Lo bandido Cucaracha teneba un amagadero en las enrunas d'un pallar en la val d'Emposta, en dirección a los termins de Sastago y La Puebla d'Íxar. A mitat de lo sieglo XX yera un casal cuasi despoblau, y entre la poca presencia humana que i heba yeran lo Tio Pantojo (guarda d'una finca tamién dita la Romana) y uns pastors trasuants de Tramacastiella de Tena que i teneban una caseta pa los meses que i yeran.

• (es) Concepción Contel Barea: El císter zaragozano en los siglos XIII y XIV Abadía de Nuestra Señora de Rueda de Ebro Revista de historia Jerónimo Zurita, ISSN 0214-0993, num. 27-28, 1974‑1975, pags. 195-465.