Ceresa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre a ceresa, fruito comestible. Ta atros emplegos de «ceresa», se veiga Ceresa (desambigación).

A ceresa u ciresa (d'o latín vulgar <CERESĪA,^[1] con o mesmo significato) ye o fruito caracteristico d'os árbols y arbustos d'o subchenero Cerasus, adintro d'o chenero Prunus, que en aragonés se conoix de forma popular como «cereseras» u «cireseras». Bellas variedaz de ceresas, de mida mas chicorrona y sabor mas aguda que as comuns, reciben o nombre mas especifico de guindas (chermanico <*wīksǐna, a traviés d'o franco ripuario <wîshila^[2]).

A ceresa ye una drupa con ruello duro en l'interior, de color roya intensa cuan ye madura y sabor dolza. Se'n culle en primería de verano, tipicament mientres un curto periodo que va dende a segunda quinzena de chunio y a primera de chulio, anque as calendatas exactas penden d'o puesto y de cada árbol en particular. As ceresas son maduras en l'árbol muit poco tiempo (pocos días) y os paixaros as consumen con voracidat, por a cual cosa pa cullir-ne cal mirar o momento cutio-cutio y, si se'n quiere fer buena cullita, cal prener precaucions especial pa guardar-las contra os animals, como cubrir l'árbol con retes os días enantes.