Bruselas

En o lexico comercial aragonés d'o sieglo XV s'escribiba Bruxeles (en Monzón), Bruxellyas (en Uesca)^[1] u Bruxellas.

A ciudat de Bruselas ya existiba en o sieglo VII, pero a suya importancia naixió con os contes de Lovaina, que en facioron a suya capital. Situata en a val d'o río Senne, afluent d'o río Escalda, estió un important centro comercial, dentrando en o sieglo XIII en o Ligallo Hanseatico.

Estió tamién a capital d'os territorios espanyols en os Países Baixos espanyols y Flandres, y tamién estió a capital d'os territorios d'os Países Baixos austriacos dimpués d'a Guerra de Succesión Espanyola. En 1815, dimpués d'o Congreso de Viena, s'encorporó a os neerlandeses, dica a independencia de Belchica en 1830, anyo en que se convertió en a capital d'o nuevo estato.

En a Primera Guerra Mundial, a ocuporon as tropas de l'Imperio Alemán y en a Segunda Guerra Mundial as tropas d'o Tercer Reich.

Con a creyación d'a Unión Europea en a segunda metat d'o sieglo XX, pasó a estar a capital d'ista institución.

En a ciudat de Bruselas se celebra anualment o Festival de Cine Fantastico de Bruselas, que concede bels premios, en destacando lo Cuervo d'Oro y lo Cuervo d'Archent.

Os esportes mas populars en Bruselas son os mesmos que o resto d'o país, o ciclismo, a natación, o fútbol y o tenis. A ciudat ye un caso rarizo entre as grans capitals europeas por que en l'actualidat no tién garra club de fútbol important a livel internacional.

A prencipal instalación esportiva d'a ciudat ye l'Estadio Rey Balduino, conoixiu popular y tradicionalment como Estadio de Heysel, a on dende a suya inaguración en l'anyo 1930 s'han feito muitos esdevimientos esportivos importants, y conoixiu mundialment por a trachedia de Heysel, en a que o 29 de mayo de 1985 morioron 39 personas y habió bels 600 ferius, a causa d'una avalancha d'aficionaus antis de principiar a final d'a Copa d'Europa que disputoron a Juventus y o Liverpool en a suya edición de 1985.

Bruselas ha estau seu de muitos esdevenimientos esportivos importants internacionalment como o Campionato Mundial de Ciclismo en Pista en a suya edición de 1930, cualques finals d'a Liga de Campiones d'Europa, d'a desapareixita Recopa d'Europa y bels partius d'as Eurocopas de fútbol de 1972 y 2000 como ciudat siede.

Tamién organizó o Campionato Europeu de Campo a Traviesa en a suya edición de 2003 y l'anyo siguient, en 2004 o Campionato d'o Mundo de Campo a Traviesa, la cita mas important d'o campo a traviesa

En ciclismo cal destacar a Brussels Cycling Classic (conoixita como París-Bruselas dica 2012) y o desapareixito Gran Premio Eddy Merckx, en homenache a o gran ciclista belga Eddy Merckx.

•   Se veigan as imáchens de Commons sobre Bruselas.
• Pachina web municipal.
• Mapa interactivo de Bruselas.