Cloro
O cloro ye un elemento quimico de numero atomico 17 situato en o grupo d'os halochens (grupo 17) d'a tabla periodica d'os elementos. O suyo simbolo ye Cl. En condicions normals y en estato puro ye un gas amariello-verdoso formato por moleculas diatomicas, Cl2, unas 2,5 vegadas mas pesato que l'aire, d'olor desagradable y verenoso. Ye un elemento abundant en a naturaleza y se tracta d'un elemento quimico esencial ta muitas formas de vida.
Caracteristicas prencipals
En a naturaleza no se troba en estato puro porque reacciona con rapideza con muitos elementos y compuestos quimicos, sino que se troba fendo parti de cloruros y cloratos, mas que mas en forma de cloruro de sodio (NaCl, sal común u sal de mesa), en as menas de sal y disuelto y en suspensión en l'augua de mar.
Se fa servir ta potabilizar l'augua de consumo disolvendo-lo en a mesma; tamién tien atras aplicacions como oxidant, blanqueyador y desinfectant. O cloro gaseoso ye muit toxico (neurotoxico) y s'emplegó como un d'os primers gases de guerra (arma quimica) en a Primera y Segunda Guerra Mundial.
Iste halochén forma numerosas sals y s'obtiene a partir de cloruros a traviés de procesos d'oxidación, por un regular por medio d'electrolisi. Se combina facilment con a mayor parti d'os elementos. Ye licherament soluble en augua (uns 6,5 g de cloro por litro d'augua a 25 °C), en parti formando acido hipocloroso (HClO).
En a mayoría d'os numerosos compuestos que forma presenta estato d'oxidación -1. Tamién puet presentar os estatos d'oxidación +1, +3, +5 i +7.
