Ludwig I. vu Wirttebärg-Aurich

Dr Ludwig I. (* vor em 31. Oktober 1412; † 23. Septämber 1450 z Aurich) isch vu 1419 bis 1450 Grof vu Wirttebärg gsii.

Dr Ludwig isch dr Suhn vum Grof Eberhard IV. vu Wirttebärg un dr Henriette vu Mömpelgard. Noch em Dod vu sym Vater isch er zämme mit sym Brueder Ulrich V. vu 1419–1426 unter Vormundschaft gstellt wore. Näbe syre Mueter isch d Vormundschaft vu Beamte, sognännte Regentschaftreet, ibernuu wore.

Anne 1426 isch dr Ludwig im Alter vu vierzeh Johr fir volljehrig erklert wore un het ab do Wirttebärg zerscht ellai regiert.

Am 4. Novämber 1426, scho churz no syre Regierigsibernahm, het er z Aurich fir sich un au fir sy Brueder d Ainigunge vu dr Statthalter mit dr Rychsstedt bstetigt. Scho am Afang vu syre Herrschaft isch dr jung Grof seli beliebt gsii. D Stadt Billingen het si am 31. Oktober 1426 fir zeh Johr unter wirttebärgische Schutz gstellt, s Chloschter Herrenalb het en am 23. Augschte 1427 zum Schirmherr aagnuu. Am 29. Septämber 1427 isch dr Grof Ludwig zämme mit sym Brueder Ulrich offiziäll vum Chaiser Sigismund mit ihre Ryychsläche un dr behmische Läche bläänt wore. Am 26. Novämber 1427 isch em Grof Ludwig vum cheniglige Hofmaischter, em Grof Ludwig vu Oettingen, dr Lächesaid abgnuu wore.

Aafangs 1428 het dr Ludwig mit em Albrecht III. vu Bayern däm syni Eh mit dr Elisabeth (* um 1412), dr Halbschweschter vu sym Vater, uusghandlet ghaa. Im Ehverdrag sin unter anderem d Burg un d Stadt Geppenge as Erb vu dr Brut feschtglait un e Strofgäld im Fall, ass dr Verdrag nit yyghalte wird, veryybart wore. D Elisabeth het si aber dr Eh entzoge un het ihre Gspuusi, dr Grof Johann vu Werdenberg, ghyrote. Wäge däm het dr Ludwig die verybarte Strofgälder mieße zahle.

Wu am 29. April 1429 ihri Mueter Elisabeth z Schorndorf hochverschuldet gstorben isch, het si wäg däne Schuldforderige ne Stryt mit em Berchtold vu Schaueburg entwicklet, wu unter anderem zue sällem sym Iberfall uf di wirttebärgisch Vogtei Nagold gfiert het. Am 5. Augschte 1432 het si d Stadt Stroßburi mit em Ludwig verbindet wäge aigene Händel mit em Berchtold. Baidi si zämme vor d Schaueburg zoge, un scho am 11. Septämber isch e Fride gschlosse wore, wu alli gegesytige Forderige ufghobe wore sin.

Anne 1433 isch au dr Grof Ulrich volljehrig un dodermit Mitregänt wore, am 6. Dezämber 1433 hän si di beede Grofe z Basael ihri Freihaite vum Chaiser bstetige loo.

No dr Hochzyt vum Ulrich mit dr Margarete vu Kleve hän d Brieder anne 1441 bschlosse, Wirttebärg z daile, was im Nirtenger Verdrag vum 25. Jänner 1442 ändgiltig feschtgschribe woren isch. Dr Ludwig het dr Auricher Dail iberchu mit dr Biet im Weschten un Side vum Land mitsämt sällene im Elsass. Mempelgard isch noch em Dod vu dr Henriette vu Mempelgard anne 1444 au em Ludwig zuegschlaa wore. Dr Ludwig het Aurich zur Residänzstadt uusböue loo un het en aktivi Bolitik fir d Sterkig vu dr Chleschter in syym Yyflussberaich dribe. Bindnisbolitisch het er si dr Wittelsbacher un dr Habsburger aagneecheret. Är het zem Byschpel dr Herzog Albrecht VI. vu Eschtryych im Kampf gege d Aidgnossen unterstitzt. Är isch anne 1450 an dr Pescht gstorbe.

Dr Ludwig isch ghyrote gsii mit dr Mechthild vu dr Pfalz. D Hochzyt het am 21. Oktober 1436 z Stuegert stattgfunde. No sym Dod het si am 10. Augschte 1452 dr Herzog Albrecht VI. vu Eschtrych ghyrote. Us dr Eh mit em Ludwig sin die Chinder firigange:

• Mechthild (* no 1436; † 1495), ghyroten ab 1454 mit em Ludwig II., Landgrof vu Hesse (1438–1471)
• Ludwig II. (* 1439; † 1457), ab 1450 Grof vu Wirttebärg-Aurich
• Andreas (* un † 1443)
• Eberhard V. (* 1445; † 1496), ab 1457 Grof vu Wirttebärg-Aurich, ab 1495 Herzog Eberhard I. vu Wirttebärg
• Elisabeth (* 1447; † 1505), ghyroten ab 1470 mit em Johann III., Grof vu Nassau z Saarbrücken (1423–1472), un ab 1474 mit em Heinrich em Eltere, Grof zue Stolberg (1436–1511)

• Das Haus Württemberg – ein biographisches Lexikon. Kohlhammer, Stuttgart 1997, ISBN 3-17-013605-4
• Christoph Friedrich von Stälin: Württembergische Geschichte. Stuttgart 1856, Reprint ISBN 3-88851-301-4, S. 432 ff.

 Commons: Ludwig I. (Württemberg-Urach) – Sammlig vo Multimediadateie

Vorgänger Eberhard IV.

Grof vu Wirttebärg 1419–1442

Nochfolger Dailig vu Wirttebärg dur dr Nirdenger Verdrag

Vorgänger Dailig vu Wirttebärg dur dr Nirdenger Verdrag

Grof vu Wirttebärg-Aurich 1442–1450

Nochfolger Ludwig II.

Herrscher vo Wirtteberg (1081–1918) Aafäng ond Grofschaft bis 1495: Konrad I. | Konrad II. | Ludwig I. | Ludwig II. | Hartmann I. | Ludwig III. | Ulrich I. | Ulrich II. | Eberhard I. | Ulrich III. | Ulrich IV. | Eberhard II. | Eberhard III. | Eberhard IV. Stuegerter Linie: Ulrich V. | Eberhard VI. Uracher Linie: Ludwig I. | Ludwig II. | Eberhard V. Herzogtom vo 1495 bis 1806: Eberhard I. | Eberhard II. | Ulrich | Christoph | Ludwig | Friedrich I. | Johann Friedrich | Eberhard III. | Wilhelm Ludwig | Eberhard Ludwig | Karl Alexander | Carl Eugen | Ludwig Eugen | Friedrich Eugen | Friedrich II. Kenigreich vo 1806 bis 1918: Friedrich I. | Wilhelm I. | Karl I. | Wilhelm II.

Dä Artikel basiert uff ere fräie Übersetzig vum Artikel „Ludwig_I._(Württemberg-Urach)“ vu de dütsche Wikipedia. E Liste vu de Autore un Versione isch do z finde.