Mosche Scharet

Dr Mosche Scharet (hebräisch ‏משה שרת‎‎; * 15. Oktober 1894 z Cherson im Russische Riich, hüte Ukraine as Mosche Schertok; gstorbe am 7. Juli 1965 z Jerusalem) isch en israelische Politiker gsi. Zwüsche zwäi Amtszite vom David Ben-Gurion isch dr Scharet vo 1953 bis 1955 dr zwäit Ministerbresidänt vo Israel gsi und bis zu sim Rückdritt 1956 dr erst israelisch Usseminister.

Er het 1906 mit sinere Familie Alija uf Eretz Israel gmacht, und het mitghulfe d Stadt Tel Aviv z gründe. 1916 bis 1918 het er für d Türkei Milidäärdienst gmacht. 1931 isch er Sekretär vo dr politische Abdäilig vo dr Jüüdische Agentuur worde und 1933 dr Vorsteher. Er isch verantwortlig gsi drfür, ass e jüüdischi Brigade in dr britische Armee ufgstellt worde isch und het die illegali Iiwanderig understützt. 1947 häi en d Brite für e Zit in Haft gnoo.

Noch dr Gründig vom Stat Israel isch er dr erst Usseminister worde. Zämme mit em dütsche Bundeskanzler Konrad Adenauer het er im Septämber 1952 s Luxeburger Abkomme underschriibe, wo dr erst Schritt vo dr dütsche Widerguetmachigspolitik gsi isch.

Wo dr Ben Gurion zruggdräte isch, het dr Scharet am 7. Dezämber 1953 s Amt vom Ministerbresidänt übernoo und sich für diplomatischi Verhandlige mit de Noochberstaate iigsetzt im Geegesatz zum Ben Gurion. Dä het en am 2. Novämber 1955 wider abglööst.

Dr Scharet isch no bis 1956 Usseminister gsi, isch denn aber vor dr Sueskriise 1956 dur d Golda Meir ersetzt worde, wo weniger barat gsi isch, Kompromiss z mache. Vo denn bis 1960 het er dr Vorsitz vo dr Jüüdische Agentuur gha.

• Tamar Amar-Dahl: Moshe Sharett. Diplomatie statt Gewalt. Der „andere“ Gründungsvater Israels und die arabische Welt. 2003, ISBN 3-89975-030-6.
• Livia Rokach: Israel’s Sacred Terrorism: A Study Based on Moshe Sharett’s Personal Diary and Other Documents. Belmont 1980, ISBN 0-937694-70-3.
• Ya'acov Sharett: L’État juif et l’integrité du Liban. In: Le Monde Diplomatique. Décembre 1983, nachgedruckt in: Ramonet et al.: Proche-Orient - Une Guerre de Cent Ans. In: Le Monde Diplomatique. Manière de voir 11, Mars 1991, pp. 40–43, ISSN 0987-8610.

 Commons: Mosche Scharet – Sammlig vo Multimediadateie

• Moshe Sharett Israelischer Staatsmann und zionistischer Führer (Jewish Agency of Israel)
• Moshe Sharett (Jewish Virtual Library; änglisch)

Dä Artikel basiert uff ere fräie Übersetzig vum Artikel „Mosche_Scharet“ vu de dütsche Wikipedia. E Liste vu de Autore un Versione isch do z finde.