Vedute

E Vedute (italienisch veduta ‚Aasicht‘, ‚Ussicht‘) isch in dr Bildende Kunst (Moolerei, Grafik) die wirklichkäitsdröiji Daarstellig von ere Landschaft oder eme Stadtbild. S Wichdigste drbii isch die realistischi Abbildig und alli andere Aspäkt bi dr Gstaltig vom Bild wie Liecht und Schatte, Farbe usw. si däm undergordnet. D Vedutemoolerei isch Däil vo dr Landschaftsmoolerei und isch je noch em Expärte im 17. Joorhundert oder scho um 1500 mit Bilder wie em Gentile Bellini siner „Prozessioon uf em Markusblatz“ (1495) oder em Vittore Carpaccio sim „Wunder vo dr Reliquie vom häilige Chrüz“ (1494) entstande. Dr Schãr isch im 18. Joorhundert mit em Italie-Turismus vo de änglische Aristokrate bsundrigs populär gsi, wo die Bilder vo römische Antike oder norditaliänische Stedt as „Souvenir“ vo dr Grand Tour mit häi gnoo häi.