Radio Dreyeckland

'S links-alternativi Radioprojekt Radio Dreyeckland (RDL) wo in de 1970er-Johr als Radio Verte Fessenheim gründet worde isch, isch eins vo de erschte Freie Radios z'Dütschland gsi. Dr Name Dreyeckland stellt´s Radio in de Tradition vo de grenziberschreitend Umweltbewegig in de 70er Johr um es Dreiländereck Dütschland - Frankrich - Schwyz, wo vo RDL als Izugsgebiet agseh wird.

Entschtande isch RDL us de Anti-AKW-Bewegig, insbsundri us de Protescht um de planti Atomkraftwerke z' Fessene in Frankrich un Wyhl in Dütschland un au no Kaiseraugst in dr Schwyz. In de erschte Johr vo sinere Exischtenz het RDL als Piratesänder vo me mobile Sendewage us g'sändet, sit de 1980er Johr sändets legal uf de Frequenz 102,3 MHz us sinem Friburger Schtudio im sälberverwaltete Grethergländ. Zuesätzlich zuer Friburger Frequenz 102,3 MHz deile sich RDL un d' Radio Kanal Ratte (RKR) d' Frequenz 104,5 MHz vom Sänderschtandort Hochi Möhr (500 W) im Wisedal. RDL sändet dört vo 3 bis 15 Uhr si Widerholigs- un Nachtprogramm, vo 15 bis 3 Uhr hört me dört 12 Schtund Live-Programm us Schopfe vom Kanal Ratte.

'S Programm vo RDL wird witschtens durch Grupperadio bschtimmt, d. h. einzelni Gruppe produziere Sändige, wo uf regelmäßige Sändeplätz usgschtrahlt wärde -- so gits e Fraue- un Lesberadio, e Schwuli Welle, de anarchistisch Schwarz Kanal, de Knaschtfunk un d' Umweltsendig Global 3000. Drnäbe gits Inforadio, meh odr weniger alternativi Musiksendige un muetterschprochlichi Sendige in Russisch, Portugiesisch un Persisch.

Mit ähnliche Projekt wie s'Radio Z Nürnberg, em Querfunk Karlsrueh, em Radio Kanal Ratte [1] us Schopfe etc. duscht RDL Sendige us. RDL isch im Verbund mit de andere baden-württebergische Freie Radios in de Assoziation Freier Gesellschaftsfunk (AFF) organisiert.