Margarete Steiff

D Margret Steiff kommt am 24. Juli 1847 em schwäbischa Städtle Giinga a dr Brenz uf d Welt. Ihre Eltra send dr Friedrich ond d Maria Margarete Steiff. Des Mädle isch deane ihr dridds Kend. Zamma hend se viir Kendr uf d Welt brocht. Wia d Margret andrthalb Johr alt ischt, kriagt se a starks Fiabr ond wuud zom Doil glehmt. Zo-ma schbätra Zeitponkt stellt dr Doktr fescht, dass-se Kendrlehmong hot. Trotzdem lôôt se sich et ondrkriaga ond entwicklet sich zo-ma frehlicha Kend. En dr Schual hot se ibrdurchschnittlich guade Noda ond zeigt a grauß Organisaziootalent. En ihrer Freizeit schbiilt se mit de andre Kendr vo Giinga. Zom Doil betreit se au Kendr vo andre Miadr, wo ens Gschäft ganga miaßet.

Weil d Margret vo ihre Leit streng erzoga wuud, leabt se richtig uf, wia se em Altr vo nei Johr a Weile bei dr Familie vom Doktr August Hermann Werner wohna därf. Der probiirt, ihr Leida zo vorbessra ond operiirt se a de Fiaß; abr dr erhoffde Erfolg will sich et eistella. Nochher kommt se en d Kur noch Wildbad em Schwarzwald. Deet gfellt-ra’s au ganz guad, obwohl se a baar Monat lang vo ihrer Familie trennt ischt.

Wia d Margret mit dr Schual fertig ischt, setzt se bei ihre Eltra dure, dass dia se en a Nähschual schicket. Deet hot se zwar am Ôfang a baar Schwiirichkeida weaga ihrer Lehmong, entwicklet sich mit dr Zeit abr trotzdem zo-ra guada Schneidre.

 

Em Johr 1874 baut dr Margret ihr Vaddr sei Haus e dr Leadrgass om ond riachdet fir seine zwoi Deechtra a Schneiderei ei. Dia kennet sich bald vor lautr Ufträg nemme redda. Drom dauret’s au et lang, bis-se sich a oigna Nähmaschee kaufa kennet. Obwohl d Margret weaga ihrer Lehmong dui Maschee bloß vo dr falscha Seit her bediina kôô, isch-se arg produktiv. Drei Johr schbätr kriagt se vo ihrem ôôgheiradada Veddr Wilhelm Adolf Glatz da Rôt, zuasätzlich zo dr Näherei noh a Filzgschäft zo ereffna, was-se au duat. S Gschäft lauft so guat, dass d Margret bald a baar Näherenna eistella muaß.

Em Johr 1879 siiht d Margret en-ra Modezeitschrift a Schnittmuschtr vo-ma Elefanda. Des brengt-se uf dui Idee, en dera Form Nôdlkisse zo macha. Zamma mit ihre Näherenna fertigt se dô drvo zwoi Säck voll ond vorkauft dia Kisse uf-em Markt vo Heidaheim. Weil sich d Leit fermlich om dia Elefäntla reißet, stellt se bald au Nôdlkisse en Form vo andre Viichr her wia Hond, Katza ond Geil. De meischde Leit kaufet dia Sacha als Schbiilzeig fir ihre Kendr. Dr Aufwand fir da Filz macht em Johr 1886 1.460 Mark aus; viir Johr schbätr send’s schau 5.070 Mark.

Em Johr 1892 kommt dr erscht Steiff-Katalog mit Bildr uf da Markt. Dô dren stôht au dr Margret ihr Leitschbruch: Für Kinder ist nur das Beste gut genug. Hot em Johr 1893 alloi dr Omsatz vom Schbiilzeig noh 16.000 Mark ausgmacht, isch’r acht Johr schbätr schau uf ibr 180.000 Mark nufgleddret. A graußr Doil dô drvo hend ihre Gschäft mit de Amerikaner eibrôcht.

 

 

Em Johr 1902 entwicklet dr Richard Steiff, a Neffe vo dr Margret, ebbes ganz Neis, was bald dr grauße Renner vo dr Firma Steiff werda soll: an Teddybär,^[1] wo ma d Ärm, d Fiaß ond da Meckl bewega kô.^[2] Zonägscht abr vorkauft sich dui Erfendong gar et guat. Erscht gega Schluss vo dr Schbiilzeigmess in Leipzig, wo au der Kerle ausgstellt wuud, kriagt d Margret Steiff a Bstellong vo 3.000 Stick. Fenf Johr schbätr send’s schau fascht a Milljoo Bära, wo d Firma Steiff em En- ond Ausland vorkaufa kô, de meischde noch Amerika.

Mittlrweile tretet au em Richard Steiff seine Jonge en dui aufstrebenda Firma ei ond doilet sich vorschiidene Bereich vo dr Gschäftsleidong. D Chefe selbr geit emmr Obacht, dass d Qualideet vo ihrer War stemmt. Zo ihre Mitarbeiter ischt se zwar streng, hot abr trotzdem a fascht familiärsVorheltnis zo-nen. Damit jô koiner dia Steiff-Artikl mit sodde vo andre Firma vorwexla kô,^[3] suacht dr Franz Steiff noch-ma schbeziella Markazoiche. Dô kommt’r uf dui Idee, jedam Produkt an Knopf ens Ohr zo macha.

Em Johr 1909 kriagt Margret Steiff a schlemma Longaentzendong. Dô drvo erholt se sich nemme, so dass-se am 9. Mai rond zwoi Monat vor ihrem 62. Geburtsdag d Auga fir emmr schliaßt. Ihr Grab kô ma heit noh uf em Friidhof vo Giinga ôgugga.

 

• Am 23. Juni 2005 isch uf-em Grondstick vo dr Firma Steiff en ra moderna Archidektur a Erlebnismuseom ereffnet worra, wo uf drei Stockwerk ibr d Gschicht vom Teddybära ond vo dr Firma enformiirt. Des Museom hot da Nama Die Welt von Steiff kriagt.
• S oizig Gymnasiom, wo’s en Giinga hot, hot da Nama Margarete-Steiff-Gymnasium kriagt.

S Leaba vo dr Margarete Steiff ischt em Johr 2005 vom Regisseur Xaver Schwarzenberger mit dr Heike Makatsch en dr Titlroll firs Fernseha vorfilmt worra, lueg dô drzua da Artikl Margarete Steiff (Film).

• Sabine Völker-Kramer: Wie ich zur Teddymutter wurde. Das Leben der Margarette Steiff, Vrlag vo dr Evangelischa Gsellschaft 1997, ISBN 978-3-79181-978-5
• Annegret Erhard: Margarete Steiff, Ullstein 2000, ISBN 978-3-548-35945-8
• Bernd Brunner: Eine kurze Geschichte der Bären, Claassen-Verlag, 2005 ISBN 978-3-546-00395-7
• Ulrike Halbe-Bauer: Margarete Steiff: Ich gebe, was ich kann. A biografischr Roman, Brunnen 2007, ISBN 978-3-7655-1965-9

• Margarete Steiff – Mutter der Steifftiere a Porträä vo dr Margarete Steiff bei planet-wissen.de
• d Website vo dr Firma Steiff

1. ↑ Em Johr 1902 hot der abr noh et so ghoißa! Wia der zo seim Nama komma ischt, isch a andra Gschicht.
2. ↑ Manche Quella schreibet dui Erfendong au andre Persona zua.
3. ↑ Enzwischa send au andre Firma uf dui Idee komma, Teddybära zo produziira

Dä Artikel basiert uff ere fräie Übersetzig vu dere Version vum Artikel „Margarete_Steiff“ vu de dütsche Wikipedia. E Liste vu de Autore un Versione isch do z finde.