Otto Gröger

Dr Otto Gröger (* 4. Augschte 1876 z Reichenau an der Rax (Nidereschtrych); † 19. Augschte 1953 z Gmunden (Obereschtrych), isch e eschtrychisch-schwyzerische Dialäktforscher, Titularprofessor an dr Universitet Züri, Redakteur un speter faktische Chefredakteur am Schwyzerische Idiotikon gsii.

Dr Gröger isch anne 1876 z Nidereschtrych as Suhn vum Franz Gröger, eme Bankdirektor, un dr Maria geb. Callmus uf d Wält chuu. Är isch z Wien uf d Volksschuel un het dert am Gymnasium am Schottenstift d Matura gmacht. Noch eme zwaijehrige Militerdienscht het er sich anne 1897 an dr Universitet Züri immatrikuliert un het Germanistischi Linguischtik, Angelsächsischi Sproch un Literatur un Psychologi studiert. Anne 1909 het er bim Albert Bachmann promoviert mit ere Arbet iber di althochdytsch un altsächsisch Kompositionsfueg.

Ab 1911 isch er Redakteur, ab 1913 «Bureauchef» bim Schwyzerische Idiotikon gsii. Noch em Dod vum Albert Bachmann 1934 het er bis änds 1950 as faktische Laiter vu dr Werterbuechstell («Chef des Reaktionskollegiums», wie s im Johresbricht 1950 haißt) gwirkt; ganz ufgherd schaffe hed er im Johr druf. Dr Laitend Usschuss hätt zwor lieber dr Wilhelm Wiget, dr Walter Henzen oder dr Manfred Szadrowsky as starche Chefredakteur gseh, aber die hän nid chenne oder nid welle. Dr Usschuss het aber duregsetzt, as dr Eduard Schwyzer bis zu sym Dod 1943 alli Artikel vo dr Redaktore het chenne yberprieffe. – Noofolger as Redakteur isch dr Kurt Meyer und as Chefredakteur dr Hans Wanner woore.

Dr Otto Gröger isch au Mitgrinder vum Phonogramm-Archiv vu dr Universitet Züri gsii un vu 1913 bis 1936 au dr tächnisch Laiter dervu. Fir s Phonogramm-Archiv het er e Huffe Tonbandufnahme vu Schwyzer Mundarte gmacht. 1921 hed er iber dr bairisch Dialäkt vum bindnerische Dorf Samnaun habilitiert. Syter anne 1921 isch er au Privatdozänt fir germanischi Philologi an dr Universitet Züri gsii, ab 1927 Titularprofessor.

Anne 1913 het er sich z Chüsnecht yyburgere loo. Syy Frau isch d Elsa geb. Wolfsgruber gsii, d Tochter vum ene Birgermaischter vum eschtryychische Gmunden.