Jean Bauhin

Dr Jean Bauhin (* 24. August 1511 z Amiens; † 23. Januar 1582 z Baasel) isch e franzöösische Arzt gsi.

Dr Bauhin isch no jung gsi, won er scho Liibarzt vo dr Johanna vo Albret, dr Königin vo Navarra worde isch. Er het zum reformierte Glaube konwertiert, isch wäge däm verfolgt worde und uf Ängland gflüchdet. Noch drei isch er zrugg uf Frankriich. Wo mä denn wider aagfange het, d Hugenotte z verfolge, isch dr Bauhin z Bariis gfangegnoo worde und mä het en zum Dood dur Verbrenne verurdäilt. D Brinzässin Margaretha, d Schwüster vom Franz I. het s duuregsetzt, ass er begnadigt wurd, und en zu iirem Liibarzt gmacht.

D Verfolgig het aber nid ufghöört und dr Baudin isch uf Amsterdam. 1542 het er z Antwärpe as Arzt gschafft, wo mä in äinere Nacht alli Brotestante gfange gnoo und hiigrichdet het. Im Baudin isch s glunge z flüchte und er isch uf Baasel. Dört het er zerst in dr Druckerei vom Froben as Korrektor gschafft, und sich denn as Arzt niidergloo. 1575 isch er usserordentlige Brofässer an dr Uniwersidäät Baasel worde und isch 1580/81 Dekan vo dr Medizinische Fakultäät gsi.

Dr Jean Bauhin isch dr Stammvater vo dr Baaseler Gleertefamilie Bauhin gsi, wo bis ins 18. Joorhundert z Baasel e Hufe Mediziner und sustigi Akademiker gstellt het. Sini Söön Caspar und Johann si berüemti Ärzt und Botaniker worde.