Heinzebärg

Dr Heinzebärg (uf Rätoromanisch Mantogna) isch dr Bärghang uf dr weschtliche Syte vom Taal zwüsche Thusis und Rhäzüns im Kanton Graubünde. Bim Dorf Präz stoot d Burg Heinzebärg, wo im früene 13. Joorhundert vermuetli vo de Freiherre vo Vaz bout worden isch. Ane 1384 isch dr Heinzebärg s erschte Mol in ere Kwelle erwäänt worde.

Vom Taalbode am Hinderrhy goot dr Bärghang liecht und a de meischte Stelle nid seer steil bis zum Graat ufe, wo dr Heinzebärg vom Safietaal im Weschte abgränzt.

D Höchi foot im Süde bim Glaspass, wo uf 1843 Meter über Meer liit, und im Tobel vom Nollabach a und goot öpe 15 Kilometr wyt bis uf Bonaduz. Dr Lüschgrat isch mit 2180 Meter der höchst Punkt vo dr Bärgchetti.

Unde am Bärg ligge d Ortschafte Thusis und Cazis, chly wyter oben am Hang d Dörfer Masein, Tartar, Urmein, Flerde, Portein, Sarn, Dalin und Präz und chly under em Glaspass d Walsersiidlig Tschappina. Uf em Heinzeberg sind die grosse Alpgebiet Bruuchalp, Lüschalp, Pascumin, Porteiner Alp, Sarneralp, Präzer Alp und Neualp. Am Bärg hets vil Waldflechine, bsunders i de Bachtobel und oberhalb vo Oberrealta.