Alfred Dreyfus

De Alfred Dreyfus [alˈfʀɛd dʀɛˈfys] (* 9. Oktober 1859 z Milhüse; † 12. Juli 1935 z Paris) isch e franzesischer Offizier gsi.

De Alfred Dreyfus isch als Sohn vu eme Textilunternehmer us Milhüse uf d Welt kumme. Nochdäm s Elsass durich de Ditsch-Franzesische Krieg 1871 zum Dytsche Riich kumme isch, isch er mit eme Teil vun de Familie uf Paris gonge un het di franzesisch Schtaatsbirgerschaft nit verlore. Er het vun 1882 bis 1889 schtudiert un isch Berufsoffizier in de franzesische Armee worre.

1894 isch em, als Houptmann, Gheimnisverrot vorgworfe worre. Er soll Gheimniss on s Dytsch Riich verrote ho un isch om 22. Dezember 1894 vum em Kriegsgricht z Rennes wege Londesverrat degradiert worre un zuer lebenslänglige Verbannung uf de Teifelsinsel (bi Cayenne, Franzesisch-Guayana) verurteilt worre. Om 5. Jänner 1895 isch d Degradierung in ere ernidrigendere Form in de Ecole Militaire vollzoge worre, voerb er om 17. Jänner uf d Teifelsinsel deportiert worre isch. Im Zommenhong mi em Prozess isch s zue antisemitischi Demonschtratione un ere nationalistische Hetz gege de Dreyfus un d Republik in de Press kumme.

In de folgende Johr isch us em Justizirrtum e Justizskandal worre, wil Bewiis gfälscht worre sin un de eigetlig Schuldig deckt worre isch. D franzesisch Republik isch vun de Dreyfus-Affäre erschittert worre un om Rond vun eme Birgerkrieg gschtonde.

Schu bal het sich rusgstellt, dass d Bewiis gege de Offizier gfälscht worre sin. De Émile Zola un ondri hen sich fir d Rehabilitierung iigsetzt. Bekonnt worre isch de Brief vum Zola J’accuse, wu in de Zytung L'Aurore erschine gsi isch.

1899 isch de Prozess nomel ufgrollt worre. Em Onklagte Dreyfus sin aber nur milderndi Umschtänd zuebilligt worre, un er isch zue 10 Johr Gfängnis verurteilt worre. De nej franzesisch Präsident Émile Loubet het sich de international Kritik bejgt un de Dreyfus begnadigt. De Alfred Dreyfus isch im Erschte Weltkrieg als Major reaktiviert worre un het in de franzesisch Armee dient. Deno isch er schpäter zum Oberstleutnant beferdert worre. Mit däm Rong isch er deno endgiltig us dr Armee usgschide.

Om 12. Juli 1935 isch de Alfred Dreyfus z Paris gschtorbe.

D Dreyfus-Affäre isch au im Mittelpunkt vun de Filmbiografii The Life of Emile Zola (1937) unter de Regie vum William Dieterle mit em Paul Muni als Zola un em Joseph Schildkraut als Dreyfus gschtonde.