Voet

Voet kan ook na 'n lengtemaat verwys. Sien voet (lengtemaat).

'n Voet (meervoud: voete) is 'n ledemaat wat aan die punt van 'n been aangetref word. Voete word gebruik om te loop, en dit is ook belangrik vir balans: dit laat mens regop staan. Voete kan ook gebruik word om mee te skop, vir beide om te veg en vir sport soos sokker.

Mense se hande en voete het min of meer dieselfde vorm: beide het vyf vingers of tone. Baie ander diere met rugwerwels het ook vyf vingers of tone per hand of voet. Die helfte van 'n menslike liggaam se bene is in die voete geleë. Artse wat met mense se voete werk, word podiatriste genoem.

Diere het gewoonlik voete, en daar is baie verskillende soorte voete. Wanneer 'n dier sagte voete het, of voete met sagte dele aan die onderkant, word daarna verwys as 'n poot.

In baie kulture hou mense daarvan om hul voete te bedek wanneer hulle saam met ander mense of in die openbaar verkeer. In sommige kulture soos die Noord-Amerikaanse-, Europese-, Japannese-, en andere kulture, dra mense 'n tipe kleding oor hul voete om dit te beskerm. Hierdie voetware het spesiale name, soos sandale, skoene, en stewels. Wanneer mense vir baie lang tydperke aaneen voetware dra, kan hul voete begin sleg ruik. Indien die voetware te groot of klein vir die voete is, kan dit negatiewe gevolge vir die voete inhou, beide vir wanneer die voetware gedra word en op die langtermyn. Mense met voet-, been- en rugprobleme kan egter ook gehelp word deur spesiaal-ontwerpte skoene te dra.

Mense in verskillende dele van die wêreld het verskillende tradisies aangaande wanneer om voetware te dra. In die meeste van Europa en Kanada dra mense byvoorbeeld nie skoene of stewels binninshuis nie. In die Verenigde State dra mense weer gewoonlik skoene binnenshuis. In baie kulture waar mense die heeltyd skoene dra, dink hulle dat dit sleg is om nie skoene te dra nie. Om nie skoene te dra nie is egter goed vir die voete, veral vir kinders se voete.

Mediese toestande soos die atleetvoet affekteer die voete, en veroorsaak dat dit droog voel en kraak.