Spilmoondhede
Die Spilmoondhede (Duits: Achsenmächte, Italiaans: Potenze dell'Asse, Japannees: 枢軸国 Sūjikukoku) was die lande wat die Geallieerdes teëgestaan het tydens die Tweede Wêreldoorlog. Die drie voorste magte, Nazi-Duitsland, die destydse fascistiese Italië en die Japannese Keiserryk, was militêre bondgenote na die ondertekening van die Driepartyepakt in September 1940 en die Spilmoondhede was amptelik gestig. Aan die piek van hul bestaan het die Spilmoondhede ryke oorheers wat groot dele van Europa, Asië, Afrika en die Stille Oseaan gedek het, maar die Tweede Wêreldoorlog het geëindig in hul nederlaag. Soos ook die geval met die Geallieerdes was, was die lidmaatskap van die Spilmoondhede in konstante verandering en sommige nasies het by die Spilmoondhede aangesluit en hulle weer verlaat tydens die verloop van die oorlog.
Oorsprong
wysigDie term is vir die eerste keer deur Benito Mussolini in November 1936 gebruik toe hy gepraat het van 'n Rooms-Berlynse spil wat besig was om op te rys uit die vriendskapsverdrag wat deur Italië en Duitsland op 25 Oktober 1936 onderteken is. Mussolini het verklaar dat die twee lande 'n "spil" sou vorm waarom die ander state van Europa sou draai. Italië was oorspronklik 'n teenstander van Duitsland, maar na die Volkebond Italië se oorlog teen Abessinië teengestaan het, het Duitsland Italië ondersteun en is 'n vriendskapsbond tussen dié twee lande geskep. Die bond het in Mei 1939 verander in 'n alliansie wat deur Mussolini die "Verdrag van Staal" genoem is.
Die term "Spilmoondhede" was dan ook die amptelike, gebruiklike term na Duitsland, Italië en Japan die Driepartyepakt op 27 September 1940 onderteken het. Hongarye (20 November 1940), Roemenië (23 November 1940), Slowakye (24 November 1940) en Bulgarye (1 Maart 1941) het later ook by die verdrag aangesluit. Die magtigste militêre lede was Duitsland en Japan. Hierdie twee nasies het in 1936 ook die Anti-Kominternpakt as geallieerdes met mekaar gesluit nog voor die Driepartyepakt bestaan het.
Eksterne skakels
wysigWikimedia Commons het meer media in die kategorie Spilmoondhede.