Sergio Mattarella
Sergio Mattarella ([ˈsɛrdʒo mattaˈrɛlla]; gebore 23 Julie 1941) is 'n Christen-Demokratiese Italiaanse politikus, regsgeleerde (met fokus op die Italiaanse grondwet) en akademikus wat tussen 2011 en 2015 as regter aan Italië se grondwetlike hof, die Corte costituzionale, gedien het. In Januarie 2015 is hy as die 12de staatspresident van Italië vir 'n ampstermyn van sewe jaar verkies. Sy pligte as staatshoof is hoofsaaklik seremonieel van aard - behalwe tydens 'n regeringskrisis wanneer die president 'n sleutelrol speel en politici deur hom na die Colle ontbied word, soos die Quirinaalpaleis, sy ampsetel op die Quirinaalheuwel, in die omgangstaal genoem word.
| Sergio Mattarella | |
 | |
12de president van Italië
| |
| Ampsbekleër | |
| Termynaanvang 3 Februarie 2015 | |
| Eerste minister | Matteo Renzi Paolo Gentiloni Giuseppe Conte Mario Draghi Giorgia Meloni |
|---|---|
| Voorafgegaan deur | Giorgio Napolitano |
Persoonlike besonderhede
| |
| Gebore | 23 Julie 1941 Palermo, Koninkryk van Italië |
| Eggenoot/-note | Marisa Chiazzese (sterf 2012) |
| Kind(ers) | 3 (Laura, Francesco en Bernardo) |
| Alma mater | La Sapienza-universiteit, Rome |
| Handtekening | 
|
Sergio Mattarella se vader, Bernardo Mattarella, was 'n invloedryke politikus van Italië se Christen-Demokratiese party Democrazia Cristiana wat sewe keer as minister gedien het. Sy ouer broer Piersanti was 'n waagmoedige goewerneur in Sisilië wat ferm teen Mafiastrukture opgetree het. Op Driekoningsdag 1980 is hy, nadat hy 'n mis bygewoon het, in sy motor deur Mafialede geskiet en kort daarna in die arms van Sergio dood. Sergio Mattarella se toetrede tot die aktiewe politiek word deur hom as 'n geleentheid beskou om voort te gaan met Piersanti se politieke missie. In teenstelling met sy voorganger Giorgio Napolitano, wat daarvan gehou het om 'n aktiewe rol in Italië se politieke lewe te speel ('n oortuiging wat hom die bynaam "Koning Giorgio" besorg het), beskou Mattarella homself as 'n soort onpartydige skeidsregter.[1]
Sedert die afsterwe van Sergio Mattarella se eggenote Marisa in 2012 woon hul dogter Laura (* 1968) saam met haar vader belangrike openbare plegtighede by en tree ook as Italië se Eerste Dame op.