Otto du Plessis

Dr. Josias Hendrik Otto du Plessis (23 Februarie 1907 – 28 April 1960) was ‘n dinamiese leier op kulturele en politieke gebied in die middel van die 20ste eeu.

Otto du Plessis is op Vanrhynsdorp gebore, het skoolgegaan in Bredasdorp en studeer aan die Universiteit van Stellenbosch. Vanaf 1931 is hy joernalis by Die Burger en daarna direkteur van staatsinligting, van 1937 tot 1946 die stigter en eerste redakteur van Die Oosterlig in Port Elizabeth. In 1948 en 1949 is hy redakteur van Die Volksblad in Bloemfontein, van 1949 tot 1953 lid van die Suid-Afrikaanse afvaardiging na die Statebondskonferensie en van 15 April 1953 tot 11 Mei 1959 die Volksraadslid vir Stellenbosch. Op 12 Mei 1958 word hy benoem tot administrateur van Kaapland. Hierdie pos beklee hy tot die dag van sy dood.

Du Plessis was ‘n leiersfiguur by die organisasie van die Simboliese Ossewatrek en weer by die Van Riebeeckfees. Hy was as redakteur van Die Oosterlig nou betrokke by die kultuurstryd van die Afrikaner in die Baai. Tydens die Tweede Wêreldoorlog was hy Nazi-gesind en het in Januarie 1941 by die Nuwe Orde van Oswald Pirow aangesluit.

Uit erkentlikheid vir sy bydrae tot die ontwikkeling van Suid-Afrika kom sy naam nog dikwels voor. Voorbeeld hiervan is die Otto du Plessis-pas, Otto du Plessis-pad, Otto du Plessis-brug, Otto du Plessis-rylaan, Hoërskool Otto du Plessis in Algoapark en die Otto du Plessis Hospitaal in Bredasdorp.