Filips die Goeie
Filips die Goeie (Dijon, 31 Julie 1396 – Brugge, 15 Junie 1467) was die hertog van Boergondië, Brabant, Limburg en Luxemburg, en die graaf van Vlaandere, Artesië, Henegouwen, Holland, Zeeland en Namen. Filips was die enigste wettige seun en opvolger van Jan sonder Vrees in Boergondië, Franche-Comté, Vlaandere en Artois.
As verdienste vir die unifikasie van die Nederlande is hy later deur die humaniste as grondlêer van die Nederlande vereer. In sy binnelandse politiek het Filips die sentralisasie kragtig bevorder deur beter organisasie van die Groot Raad; gemeenskaplike vergaderings van afvaardigings uit die verskeie gewestelike State (wat die oorsprong van die latere State-Generaal was); die binding van die Geestelikheid deurdat die vors beskik het oor baie kerklike aanstellings; en die binding van die adel deur die instelling van die Orde van die Goue Vlies.
Filips was ’n belangrike beskermer van die letterkunde en kuns; sy biblioteek was die beroemdste van sy tyd en daar was talryke kunstenaars in sy diens (onder andere Jan van Eyck). Hy is in Dijon (die hoofstad van die hertogdom Boergondië) begrawe.
Karel die Stoute was die seun van Filips die Goeie en Isabella van Portugal.
