Anthony Quinn
Anthony Quinn (gebore as Antonio Rodolfo Quinn Oaxaca; 21 April 1915 – 3 Junie 2001)[1] was ’n Amerikaanse akteur, skrywer en skilder wat in Mexiko gebore is. Hy het in verskeie suksesvolle prente gespeel, onder meer La Strada, The Guns of Navarone, Zorba the Greek en Lawrence of Arabia.
| Anthony Quinn | |
| |
Quinn omstreeks 1955.
| |
| Geboortenaam | Antonio Rodolfo Quinn Oaxaca |
|---|---|
| Geboorte | 21 April 1915 Chihuahua, Mexiko |
| Sterfte | 3 Junie 2001 (op 86) |
| Beroep(e) | Akteur, skilder, skrywer, regisseur |
| Aktiewe jare | 1936–2001 |
| Rolprente | The Guns of Navarone, Zorba the Greek, Lawrence of Arabia |
| Internet-rolprentdatabasis-profiel | |
Loopbaan
wysigQuinn, wat vroeg in sy lewe professioneel geboks het om geld te verdien, het vir ’n rukkie op die verhoog toneelgespeel voordat hy in 1936 karakterrolle in rolprente begin vertolk het, soos in sy debuut, Parole, en The Milky Way. Hy het "etniese" skurke uitgebeeld in prente soos Dangerous to Know (1938) en Road to Morocco (1942).
Teen 1947 was hy in meer as 50 prente en het hy die rol van Indiane, Mafiabase, Hawaise stamhoofde, Filippynse vryheidsvegters, Sjinese guerrillas en Arabiese sjeiks vertolk, maar was steeds nie ’n groot ster nie. Hy het na die teater teruggekeer en op Broadway in A Streetcar Named Desire gespeel. In 1947 het hy ’n Amerikaanse burger geword.[2]
Hy het in die vroeë 1950's na Hollywood teruggekeer en ruwe rolle vertolk. Sy deurbraak was in 1952 in Elia Kazan se Viva Zapata!, saam met Marlon Brando. Hy het vir sy spel ’n Oscar vir beste manlike byspeler gewen. Hy was die eerste Mexikaanse Amerikaner wat die prys gekry het.
Een van sy beste vertolkings was in Federico Fellini se La strada (1954). Hy het sy tweede Oscar vir beste manlike byspeler gewen vir die uitbeelding van die skilder Paul Gauguin in Lust for Life (1956). Die volgende jaar is hy vir ’n Oscar benoem vir sy spel in Wild Is the Wind.
Aan die einde van die dekade het Quinn ’n ruwer voorkoms gekry en begin uitblink in karakterrolle. Hy was ’n Griekse rebel in The Guns of Navarone (1961), ’n ouer wordende bokser in Requiem for a Heavyweight en ’n Bedoeïene-sjeik in Lawrence of Arabia (albei 1962).
Die sukses van Zorba the Greek in 1964 het gelei tot nog ’n Oscar-benoeming, dié keer vir beste akteur. Ander prente sluit in The 25th Hour, The Magus, La Bataille de San Sebastian en The Shoes of the Fisherman.[3] In 1969 was hy in The Secret of Santa Vittoria en is hy vir ’n Golden Globe benoem.[4] In 1976 het hy in die prent Mohammad, Messenger of God (ook bekend as The Message), oor die oorsprong van Islam, die rol vertolk van Hamza ibn ‘Abd al-Muttalib, ’n hoogs gerespekteerde oom van die profeet Mohammed.[3]
Quinn het sedert die 1990's in minder rolprente verskyn; hy was onder meer in Revenge (1990), Jungle Fever (1991), Last Action Hero (1993), A Walk in the Clouds (1995) en Seven Servants (1996).[3] In 1994 het hy die rol van Zeus vertolk in vyf televisieflieks oor die mitiese reise van Hercules.
Verwysings
wysig- ↑ Scott L. Baugh, Latino American Cinema: An Encyclopedia of Movies, Stars, Concepts, and Trends, bl. 221. Greenwood, 2012. ISBN 978-0-313-38036-5.
- ↑ Profiel, FilmReference.com; besoek op 7 Maart 2015.
- ↑ 3,0 3,1 3,2 IMdb-profiel
- ↑ Golden Globe awards: 1970, imdb.com; besoek op 30 Maart 2015.
Eksterne skakels
wysig- Anthony Quinn in die Internet-rolprentdatabasis
- Anthony Quinn in die Internet-Broadway-databasis
- Anthony Quinn in die TCM-rolprentdatabasis
Wikimedia Commons het meer media in die kategorie Anthony Quinn.
Hierdie artikel is vertaal uit die Engelse Wikipedia