Mykonos
Mykonos is die algemene naam vir die kasino, vakansie-oord en residensiële ontwikkelings aan die Kaapse Weskus tussen Langebaan en Saldanha. Dit is in die jare tagtig met fondse van Masterbond gebou, maar het ondanks die gevolglike finansiële ineenstorting van die maatskappy daarin geslaag om voort te bestaan en beleef tans ongekende groei danksy talle residensiële ontwikkelings in die gebied.
'n Nuwe privaatskool, Curro, het aan die begin van 2007 sy deure hier geopen en het in die eerste jaar klasse van gr. 1 tot gr. 8 aangebied. Die grade word een vir een jaarliks verhoog. Die Weskus se eerste groot winkelsentrum is in 2008 hier in gebruik geneem met die voltooiing van die Laguna Mall.
