Hesse (soldate)

Hesse
18de eeuse uitbeelding van twee Hessiese soldate
Land	Hesse-Kassel
Onderdeel van	Die meeste het gedien met maar is nie in die Britse leër opgeneem nie
Veldslae	Slag van Long Island Slag van White Plains Slag van Fort Washington Slag van Brandywine Slag van Trenton Slag van Bennington Slag van Germantown Slag van Springfield Slag van Monmouth

Die Hesse of Hessians [ˈhɛʃənz], soos hulle in Engels genoem is, was 18de eeuse kontraksoldate wat deur die heersers van Duitse state verhuur is om aan die kant van Britse troepe te veg. Die destydse Britse regering het minder moeilikhede ondervind om lenings vir die huur van vreemde soldate aan te gaan as om Britse rekrute te werf.^[1]

Die historiese naam van Duitse stryders in Britse diens is van die deelstaat Landgraafskap van Hesse-Kassel afgelei. Die verhuurde Duitse soldate is onder meer gedurende die Ierse Rebellie van 1798 teen Ierse stryders ontplooi, maar hulle word veral verbind met die Britse oorlogvoering gedurende die Amerikaanse Rewolusionêre Oorlog tussen 1775 en 1783.

Sowat 30 000 Duitse soldate het in die Amerikaanse Rewolusionêre Oorlog vir die Britse saak geveg en 'n kwart van alle stryders verteenwoordig wat deur die Britse owerheid na Amerika gestuur is.^[2] Hulle het in hul eie tradisionele uniforms in hul ou regimente en onder hul eie offisiers en hul eie vlae aan die oorlogshandelinge deelgeneem, maar het onder die algemene bevel van Britse generale gestaan. Sowat die helfte van hulle was uit Hesse afkomstig - 'n deelstaat waar die plaaslike heerser die verhuur van regimente as 'n bron van staatsinkomste beskou het.^[3] Ander klein Duitse state het eweneens kontraksoldate beskikbaar gestel. Verskeie ander Duitse eenhede is op die Britse eilande ontplooi om Britse troepe te vervang wat by die oorlog in Amerika betrokke was.

In die destydse Amerikaanse propaganda is die Duitse kontraksoldate, wat in historiese bronne as pligsgetrou en hoogs gemotiveerd beskryf word, as buitelandse huursoldate uitgebeeld wat geen verbintenis met Amerika gehad het nie. Hessiese oorlogsgevangenes is as plaaswerkers op Amerikaanse boerderye ingespan. Hulle is hul eie stuk land aangebied mits hulle sou dros, en baie van hulle is inderdaad oorreed om by die rewolusionêre Amerikaanse magte aan te sluit.

• www.hr-online.de: Hessische Soldaten im Amerikanischen Unabhängigkeitskrieg^{[dooie skakel]}