Blikaspaai
Blikaspaai is 'n speletjie, soortgelyk aan wegkruipertjie, wat deur kinders gespeel word.
Voordat die spel begin word 'n sirkel getrek om as die bof te dien. Die sirkel kan met kruit op teer of met 'n stok in die grond getrek word. 'n Blikkie met klippies word dan daarin geplaas. Die blikkie word toegekap sodat die klippies binne bly.
Die eerste speler wat "aan" is moet met toe oë binne die bof sit en tot honderd tel, terwyl sy maatjies wegkruip. Sodra hy klaar getel het begin hy die ander te soek. As hy een van hulle gewaar, roep hy: "Blikaspaai vir [maatjie se naam] [plek waar hy wegkruip]" waarna hy na die bof terughardloop en die blikkie wegskop en dan self hardloop om weg te kruip. Die speler wat uitgevang is moet die blik optel en weer in die bof plaas voordat hy na die ander begin soek.
Die wegkruipers kan ook self die blik wegskop, wat die soeker dan eers moet gaan optel en in die bof terugplaas voordat hy verder kan soek. Elke keer as die blik weggeskop word, skreeu die skopper "blikaspaai!" wat dan aan die ander spelers aandui dat hulle tyd het om beter wegkruipplekke te soek.
'n Wegkruiper wat deur die soeker gevind is kan ook self probeer om die bof voor die soeker te bereik en die blik weg te skop. Slaag hy daarin, moet hy hardloop en weer gaan wegkruip.
Die spel word binne 'n afgebakende gebied gespeel en die blik moet nie so vêr geskop word dat dit nie gesien of gekry kan word nie.
Verdere naleeswerk
[wysig | wysig bron]- Blikaspaai in die huis van die parlement, Die Beeld, 26 Junie 2001
- Manuel speel blikaspaai, Die Burger, 29 Augustus 1996