Aurora, Wes-Kaap

Aurora
Kerk op Aurora
Aurora  Aurora se ligging in Wes-Kaap
Koördinate: 32°42′S 18°29′O / 32.700°S 18.483°O / -32.700; 18.483
Land	Suid-Afrika
Provinsie	Wes-Kaap
Distrik	Weskus
Munisipaliteit	Bergrivier
Stigting	1866
Oppervlak [1]
• Totaal	1,63 km2 (0,63 vk. myl)
Bevolking  (2011)[1]
• Totaal	578
• Digtheid	355/km2 (920/vk. myl)
Rasverdeling (2011) [1]
• Wit mense	31.5%
• Indiërs/Asiërs	0.3%
• Bruin mense	67.6%
• Swart mense	0.5%
Taal (2011) [1]
• Afrikaans	92.3%
• Engels	6.4%
• Ander	1.3%
Poskode (strate)	7325
Skakelkode	022

Aurora is 'n klein dorp in die Sandveld 43 km wes van Piketberg en 29 km suid van Redelinghuys in die munisipale gebied Bergrivier met 'n bevolking van minder as 600. Die dorp lê in die provinsie Wes-Kaap van Suid-Afrika.

Gestig in 1906 en vernoem na die Romeinse godin van die daeraad. Die gemeente het ontstaan weens die onbeheerbare grootte van die NG gemeente Piketberg toe twee dogtergemeentes twee dae agtereenvolgens afgestig is: Aurora op 25 April 1906 en Redelinghuys op 26 April 1906. Die gemeente se middelpunt sou op die plaas Skreeufontein wees, waar die dorp dan ook aangelê is op 'n stuk grond van sowat 150 morge wat ouderling J.P. Kotzé as geskenk aan die kerkraad oorgedra het. Die hoeksteen van die kerkgebou, ontwerp deur die argitek William Henry Ford, is op 16 April 1908 deur prof. P.J.G. de Vos gelê, 'n jaar ná die aankoms van die eerste leraar, ds. C.R. Ferreira. Nege maande later, op 20 Januarie 1909, is die sierlike gebou in gebruik geneem. Die kerkraad het in 1924 'n pastorie op Velddrif laat bou en daardie gemeente is in 1928 van Aurora afgestig.

Tydens die lang bediening van ds. J.C. Smit (1922 tot 1947), het die skool aangegroei tot 'n hoërskool en is koshuisgeriewe vir 130 kinders daargestel. Met die jare het die ontvolking van die platteland daartoe gelei dat die Hoërskool Aurora weer afgeskaal is tot net 'n middelbare skool, hoewel hy steeds die naam van hoërskool dra. In 2008 was die leerdertal 193 van gr. 1 tot gr. 9, met 21 leerders in die laagste sowel as in die hoogste graad. In 2014 het dit teruggesak tot 179, maar in 2016 toegeneem tot 223, van wie 21 in gr. R was. Die skoolhoof was mnr. J.P. van Wyk.

Aurora beskik oor 'n braairestaurant wat besoekers van heinde en verre lok. Dit is ook 'n gewilde aftreeplek vir stedelinge vanweë die lae voorkoms van misdaad en die rustigheid. Daar is bergfietsroetes in die omgewing. Die bekende Verlorevlei by Redelinghuys is maklik bereikbaar per grondpad vanaf Aurora.

• Toeriste-inligting
• Verblyf Geargiveer 12 April 2007 op Wayback Machine
• Bergfietsry
• Bergfietsry Geargiveer 30 April 2007 op Wayback Machine

• Lys van dorpe in Suid-Afrika
• NG gemeente Aurora

• Phil Olivier (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.