黃泥涌

黃泥涌（Wong Nai Chung），又寫黃坭涌，係香港一地，亦係一涌，亦係一村。佢喺香港島中部北面，因爲黃泥涌有跑馬場之故，亦叫跑馬地。因西面有墳場，所以西人亦叫快活谷。村都拆咗好耐，而涌係變咗寶靈渠。

黃泥涌喺香港未開埠之前，屬新安縣地。而地勢平坦，係島上兩笪大平地之一，另一笪喺香港仔。所以有人在此耕田成村，是爲黃泥涌村。村地原屬香港大族鄧氏，租地畀當地人耕田。英人來港之後，同村人買地。因爲英人收地，令佢失去收租之地，所以鄧氏曾經告上新安縣衙。英人收地後，將下環嘅墳地，移到黃泥涌西部。亦都將黃泥涌峽田地嘅水疏通，填高成跑馬地，卽今日叫快活谷馬場。