先生

  想搵第二個意思嘅話，請睇先生 (搞清楚)。

先生（教書先生）^[1]，又叫做教師或老師，佢嘅工作通常係幫助學生去學嘢，或者係傳授書本上嘅知識畀學生。但係啲先生喺唔同情況下嘅工作會唔同，連個稱呼都可能會有分別，例如响香港中學流行叫先生做Sir（男人）或者Miss（女人）。

而【先生】呢個來源比較古老，古語有云，學無前後，達者為先。即係學術上比先就係先生咁，係一種尊敬人嘅叫法。《白虎通德論卷四辟雍》「尊師重先生之道也」，所講嘅先生就係教師噉解。大陸民國時期有一首小調山歌不唱忘記多，亦都有一句好比先生敎學生。而先生係敎師呢個用法一直保留響白話地方同日本。

因為以前教得書嘅大部份都係男人，所以後尾有人用「先生」呢個叫法做男人尊稱，為咗分別，有人叫教書先生。女教師都可以叫做「先生」。

睇返古文，真係教到人嘢嘅先叫先生，唔係求其搵個男人都叫先生。而家啲人叫男人做先生，實情係濫用咗「先生」呢個尊稱。廣東話尊稱男人，係叫人乜生，例如陳生李生張生。自漢朝起，學儒嘅人係叫乜生物生，睇史記就知。《史記屈原賈生列傳》「賈生名誼，雒陽人也。」呢句嘢尊稱賈誼做賈生。《史記酈生陸賈列傳》「高祖使陸賈賜尉他印為南越王。陸生至，尉他魋結箕倨見陸生。」呢句嘢尊稱陸賈為陸生。日本都尊稱人做「san」。

先生亦都有其他叫法，好似古代中國就稱呼做夫子咁。孔子就俾人尊稱佢做孔夫子。