'Eintjeszand

'Eintjeszand (Nederlands: Heinkenszand) is een durp in de gemeênte Bossele, in Zeêland. 't Durp is mie 5.555 inweuners (2023) 't hroste durp van de gemeênte.

Eintjeszand is 't bestuûrlijk centrum van de gemeênte Borsele en vervult, onder aore deur het winkelbestand, een rehionaole functie. In het durp bevindt zich 't ontmoetingscentrum "De Stenge", waorin een sporthal en 'n bibliotheêk onderhebracht bin. De rooms-katholieke Sint-Blasiuskerk te Eintjeszand is hebouwd in neogotische stiele. De kerk stamt uut 1866 en is hewied aan d'n Heilige Blasius.

Sinds 2007 draoit de hrote stellingmeulen De Vijf Gebroeders in het durp wee regelmatig. An de rand van Eintjezand bevindt zich het natuurhebied "Landgoed Landlust". In het koetsuus van het Huis Landlust zetelde voe 2007 Stichting Het Zeeuwse Landschap.

Omstreeks 1904 is Klompemaekerieë Traas ontstae. Ruum een eêuw maeke ulder klompen. Elken dag èn nog aoltied op dezelfde plekke in Eintjeszand. Vier generaties lank toe'ewijdm oer-Ollands en bekend over eêl de waereld. Natuurlijk is t'r in de lôôp van den tied eêl wat veranderd. Van puur andwerk nae mechanisatie, van leure langs de deure naè digitale verkôôp. Van een gebruuksvoorwerp naè souvenirs en Zeêuwse producten. Mae ondanks deze veranderiengen bluve m' ons ambacht koestere. Puur ambacht daè a Olland naem en faem mie eit en geschiedenis schrieft over eêl de waereld. Mae, wil je noe echt de geschiedenis zie herleve, dan zou je toch echt een bezoekje motte brienge an het unieke klompemuseum in Oedjeskerke. 't Is 't het meêr dan de moeite waerd.

Het ongerstinde verael is geschreven deu M. J. Huissoon in het dialect van Eintjeszand: 'k E't vak elêêrd van m'n voader, die a'n klêêremaekerswienkel ao op Eintjeszand. 'k Was'n jêr of vêêrtiene, toen a'k in 't vak ekomme bin, 't was in neehentienachtiene. In dien tied waere d'r nog vee venters op d'r boers, dus me waere nog echte boereklêêremaekers. 'k E toet m'n 26e jêr tuus ewist en toen è'k op Schraevenpolder 'n zaak oover'enoome en di è'k ok nog volop boerehoed emikt.

't Goed voe die boerepakken, kwam aol uut Engeland, de knoppen ok. Bekende grossiers waer'in dien tied de firma Stieher in stad en Boasson in Middelburg. Die ao dat goed in voorraed, dus dat was makkeluk. Voe de burherpakken most aoles op't stael uut'ezocht worre, wan di was zóvee verschil in hoed, a j't nie in voorraed è kon.

Voe 's zondags wiere de boerebroeken ier emikt van zwèr zwart ferwêêl, 't vest, ok rok enoemd, en 't ondervest was van zwart laeken. (bie de walchenérs was d'n broek ok van dat laeken). 't Boezeloen was van zwart kamhêren, mie ziede blommetjes of fihuurtjes op. In de weeke, op 't werk, droehe z'n broek en 'n 'emdrok van zwart bommezien en 'n hestreept boezeloen van schortebont.

Dat hoed voo daegs wier aol ier in 't land emikt. Di was ok nog 'n klein verschil in 't hoed van de Romse en de Prottestanse boeremènsen. Je kon 't zieje an de hestikte fihuurtjes op 't vest (rok). Bie de Romse was 't aoltied 'n blomme en bie de Prottestanse waere 't heeometrische fihuurtjes. Vroeher, toen aze nog 'n pluuzen 'oed droehe, kon je ze di ok an kenne. Romsen ao dan de rand van voorenni benee en bie 'n Prottestant stoeng de rand rondom ni booven, mè bie die harrebalderoeën van teehenwórug is t'r hun verschil mi in.

'k E 't wè mee'emikt, a t'r 'n zeune van 'n Romsen boer trouwden, a'k twi nieuwe pakken most maeke, êên van 'n bitje mindere kwaliteit om voe de wet te trouwen en één van de beste kwaliteit om in de kerke te trouwen. Van aol de klanten wier de maet'enoome, mè van klanten di a je hereeheld voe werkten, was dat nie mi nóódug, temissen a ze nie dikker of maeherder wiere. 'k Ao 'n klant, die, a'k'n teehen kwam mè op z'n broek wees en zei: „'t Is wee zö varre". Dan wist ik a, a'k'n nieuwen broek voe z'n maeke most. Di hieng êêl wat tied in zitt'oor, om zö'n pak te maeken. Je kon voe zo'n ferwêêlen broek ruum'n dag reekene, voe 'n emdrok en 'n ondervest ok en dat waere dan daehen van zö'n uur' of tien twelleve.

't Gerêé'schap, di a me mie moste werke, wier ok aol mè anduhher. Vaoder ao zö'n sestug jêr 'elee nog 'n striekbout, die a'j op de kachel êêt maeke most. 't 'Waere zwêr'iesders, dat most wè ok voe dat zwêre boerehoed. Laeter ao m'n striekiesder, di a me beukenouskoolen in ao, van die hloejende ouskoolen bleef j'n iesder lekker lank werm. Laeter mie't elektriese, hieng 't nog beeter. Mie 't naoimesien was 't vroeher aoltied mè draoje of trappe. Vadder ao me natuurlijk aolderande nilden, scheren en wat a t'r voe 't kléêremaekersvak nóódug was.

Was, mö'k zêhe, wan 't vak is uut'esturve. Vee kléêremaekers bin d'r a vroeg mie 'estopt, om op 'n confectiefabriek te hae werken. Di bin d'r mè ienkele, die a 't nog doeë. Zelf ê'k't ok lank 'edae en noe a'k tachentug bin, maek'k nog wè is 'n ienkele kêér 'n boere pak.

• Jan Eikelboom (1964), televisiejournalist
• Jan Raas (1952), wielrenner, ploegleider en sportdirecteur
• Jacob Schorer (1866-1957), advocaat en homo-emancipator

• Den kwêêjen and

• Plaatsengids
• AlleCijfers

Gemeênte Bossele
Durpen: Baerland · Bossele · Driewehen · 'Eintjeszand · Ellesdiek · Kwedamme · 't Lewedurp · 't Nieuwedurp · Oedjeskerke · Ouwelande · Ovezande · Schrabbekerke · Schraevenpolder · Serenoek · Ternisse Gehuchten: Baesdurp · Bikkedurp · De Hosvazze · Knapof · Koekoek · 't Langweegje · Riekebuurte · Sieskerke