拿破仑

拿破仑波拿巴(法文：Napoléon Bonaparte，1769年8月15号-1821年5月5号)是19世纪开始辰光统治法国搭欧洲大陆个独裁者，立在1804年之后自家加冕，成为法兰西第一帝国皇帝。伊本身来自地中海个科西嘉岛，早年参加科西嘉独立活动。之后立在法国大革命当中因为军功，成为雾月政变之后个都督。之后，伊远征埃及，回国推翻都督政府，开始独裁。伊拥有邪气强个军事指挥能力。立在之后好几趟拿反法同盟击破。同时讨好国内个平民搭资产者，收拢民心。到1804年，正式自立成为皇帝。1806年又逼迫奥地利放弃神圣罗马帝国皇帝个头衔。拿神圣罗马帝国终结。1808年，击破普鲁士，立在勃兰登堡门下头阅兵。同年废除西班牙个卡洛斯四世，让自家个阿哥成为傀儡国王。个辰光，伊个法兰西第一帝国向欧洲各地派遣法国官僚，用法国专制压迫欧洲老百姓，又煽动老百姓去追捧自由，扰乱当地原有个社会秩序。造成老大个破坏。弗过，因为1805年特拉法加海战个惨败，伊一直嘸能力侵略英国。1812年，拿破仑对俄罗斯进行侵略。因为战线过长，立在冬天到达莫斯科之后，俄国人还是弗投降。只好灾难性撤退。之后，反法同盟一路追击，立在莱比锡战役当中拿拿破仑击溃。伊只好退位。弗过，到1815年，伊又跑回法国，重新登基。个趟，伊立在滑铁卢战役当中畀大英名将威灵顿公爵搭普鲁士老将不履歇联合围歼，一败涂地。再次退位。畀英国皇家海军押送到大西洋高头个圣海伦娜岛度过余生。1840年，伊個靈柩重新迎回法國，安葬法蘭西榮軍院。

具体词条参见拿破仑家族

• 约瑟芬·德·波厄内，比拿破仑大6岁个寡妇，也是拿破仑第一任老婆。因为弗好帮伊生出男性继承人，畀休脱。
• 玛丽·路易莎,奥地利哈布斯堡家族个成员，畀拿破仑讨过来帮自家生后代，儿子是拿破仑二世。
• 拿破仑二世，代号罗马王，是拿破仑唯一个儿子。弗过身体弗灵光，活到21岁就死脱。

拿破仑个独裁统治，搭伊对欧洲君主国常年个侵略，除脱带来法国霸权之外，又让欧洲各地个知识分子欢呼雀跃，接受伊代表个法国大革命激进思想，个当中，就包括自有、平等、天赋人权之类，同时，也推进民粹立在欧洲各地个泛滥。拿破仑到各地打压当地老贵族，扶持地方文人，挤压教会，植入法国文人官僚系统，让各地个集权法术水准大大提高，到1815年拿破仑输脱之后，伊个影响还是一直持续。此外，拿破仑废脱从中世纪就代表西欧唯一皇帝头衔个神圣罗马帝国，造成欧洲封建秩序残余彻底完结，19世纪，欧洲冒出交交关关自称是帝国个国家，民族主义搭帝国主义个结合引发奥地利势力下降搭普鲁士势力提升，最终引发第一次世界大战。