Wå

On wå est ene pitite djåbe di do rgon, a pô près 25 cintimetes sipesse, nén batowe å flayea, ki sierveut a fé des toets di strin.

Les wås son fwaits avou do swele batou tot l' tapant so on bok. Après on scheut li strin po n' wårder ki les pus longous fistous (1 mete 20), pu les loyî.

Les wås metous ådzo divént esse foirt sitocaesses : on les lomes les pî-wås.

Li mot "wå" a dné des parints, wåmire, wåmon, wåmele.

Li strin d' swele po fé les wås ni doet nén esse batou å flayea mins sol bok. Å flayea, on bouxhe so li strin et on l' casse. Li bok, c' est come ene gade fwait avou on gros rond bwès å dzeu. On prind l' djåbe di waessin, et on lyi chnike les påtes siconte do bok. Les grinnes toumèt et les strins sont bea-z et droets, nén ployîs.

Cwand on-z a yeu tot batou, i fåt scheure li strin po li rnetyî l' mî k' on pout. I fåt eto scheure les courts fistous foû. On pleut fé ça avou on seri. On seri, c' est ene plantche avou des grandès pontes clawêyes dissu. Normåldimint, c' est po serijhî l' tchene, mins on l' pleut eployî po scheure les wås. Après, to leyes toumer l' wå a tere, et li rsouker (li rprinde et li rleyî toumer co on côp) po k' i soeye bén droet do cou.

Po fé tos wås les minmes, on coûtchive li cschoyou strin dins on batchea fwait avou troes platches li cene di fond esteut 50 cm lådje. On-z î meteut les pougneyes a fwait k' elle estént pingneyes. Cwand on-z arivéve å raeze des plantchetes on loyive li wå avou deus loyéns, onk ådzeu et onk ådzo po n' nén casser li strin.

On prindeut on wå cwand on-z aléve dins les tchanps, po-z esprinde en fouwêye.

On s'endè sierveut eto po griyî l' pourcea.