Buinsk

Eländpunktan aluz om pandud vl 1691. Se sai makundan lidnan statusad vl 1780.

Buinskan ižandusen päsarak om sömtegimišt (etilspirt, sahar, sep, kombisöte, argvoi, sagud, lihaproduktad), mugažo elektromehanine i mašinansauvomižen tegimed oma olmas. Bua-raudtestancii sijadase «Joškar-Ol — Ul'janovsk»-jonol.

Lidn sijadase Karlanjogen hural randal (tot.: Карлы, Svijagan hura ližajogi), 80 m ü.m.t. keskmäižel korktusel. Matkad Kazanihesai om 104 km pohjoižpäivnouzmha orhal vai 135 km avtotedme, Ul'janovskhasai om 80 km suvhe sil-žo tel. Lähembaine lidn om Tetüši 40 km päivnouzmha orhal.

Buinsk om lidnankundan üks'jäine eländpunkt.

Vn 2010 kaiken Venäman rahvahanlugemižen mödhe eläjiden lugu oli 20 352 ristitud, rajonan ristitišton pol'. Kaikiš suremb lidnan ristitišt oli 20 905 eläjad vl 2017.

Rahvahad (ozutadud rahvahudenke vl 2010): totarlaižed — 71,1%, venälaižed — 19,2%, čuvašalaižed — 8,4%, toižed rahvahad — 1,3%.

Islaman «Abu Hanifa»-mečet' (vspäi 2020) i medrese ratas lidnas. Ortodoksižen hristanuskondan Eläban Eziauguižen Stroican päjumalanpert'^[1] (1791−1828) om avaitud.

Buinskan veterinarine tehnikum^[2] i Buinskan medicinine škol^[3] oma lidnan profopendusen aluzkundoikš.

Edeline lidnan i rajonan pämez' om Marat Zäbbarov (sügüz'ku 2017 — sügüz'ku 2019).

1. ↑ Buinskan pühäpertid sobory.ru-saital. (ven.)
2. ↑ Buinskan veterinarine tehnikum edu.tatar.ru-saital. (ven.) (tot.)
3. ↑ Buinskan medicinine škol edu.tatar.ru-saital. (ven.)

• Lidnan da Buinskan rajonan oficialine sait (buinsk.tatarstan.ru) Tatarstanan Tazovaldkundan tobmuden portalal. (ven.) (tot.)